सिगारेट पिताना वाद, तरुणांनी डोक्यात दगड घालून व्यावसायिकाचा घेतला जीव, जळगावातील धक्कादायक घटना!

अमर सपकाळे असं हत्या झालेल्या लाँड्री व्यावसायिकाचं नाव आहे. त्यांचा मृतदेह खंडेराव नगर परिसरातील रेल्वे रुळाजवळ संशयास्पद स्थितीत आढळला होता. सुरुवातीला ही घटना रेल्वे अपघाताचा प्रकार असावा असा संशय व्यक्त केला जात होता. मात्र, रामानंदनगर पोलिसांनी घटनेचे गांभीर्य ओळखून तांत्रिक आणि गोपनीय माहितीच्या आधारे तपास सुरू केला.

तपासादरम्यान पोलिसांनी एका अल्पवयीन संशयित आरोपीला ताब्यात घेतले. त्याची कसून चौकशी केली असता त्याने गुन्ह्याची कबुली दिली. संशयित आरोपीने दिलेल्या माहितीनुसार, घटनेच्या रात्री संशयित दोन आरोपी रेल्वे रुळाजवळ सिगारेट पीत बसले होते. त्याच वेळी अमर सपकाळे तिथे आले. ते दारूच्या नशेत होते. नशेत असलेल्या सपकाळे यांनी आरोपींना काही कारणावरून शिवीगाळ केली. याच रागातून आरोपींनी सपकाळे यांच्या डोक्यात मोठा दगड घालून त्यांची हत्या केली.

या प्रकरणात एका अल्पवयीन आरोपीला ताब्यात घेण्यात यश आले असले तरी, त्याचा दुसरा साथीदार अद्याप फरार आहे. रामानंदनगर पोलीस पथक या दुसऱ्या संशयित आरोपीचा शोध घेत आहे. रात्री उशिरापर्यंत पोलीस ठाण्यात खुनाचा गुन्हा दाखल करण्याची प्रक्रिया सुरू होती.