Maratha Reservation : उपोषण मागे घेण्यासाठी राज्य सरकाराचं विनंती पत्र; मनोज जरांगे-पाटील म्हणाले...

जालना, 7 सप्टेंबर : मराठा आरक्षणाच्या मागणीसाठी जालना येथील अंतरवाली सराटी गावात उपोषण करत असलेल्या मनोज जरांगे पाटील यांच्या उपोषणाचा आज दहावा दिवस आहे. दरम्यान, आज त्यांनी पत्रकार परिषद घेऊन आपली भूमिका मांडली. सरकारने काल (बुधवारी) मराठा आरक्षणासंदर्भात आदेश काढले. पण या आदेशाची प्रत आमच्यापर्यंत आली नाही. मराठा समाजातल्या ज्या लोकांकडे कुणबी असल्याची नोंद आहेत, त्यांना आजपासून कुणबी प्रमाणपत्र देण्यात येणार आहे. पण सरसकट सर्व मराठा समाजाला कुणबी प्रमाणपत्र देण्याची आमची मागणी आहे. आमच्याकडे कुणाकडेच कुणबी असल्याची नोंदी नाहीत. त्यामुळे कालच्या निर्णयाचा काहीच फायदा होणार नाही. त्यामुळे यात सुधारणा केली पाहिजे, अशी मागणी मनोज जरांगे यांनी केली आहे. तर दुसरीकडे सरकारने जरांगे पाटील यांनी पत्र लिहून उपोषण मागे घेण्याची विनंती केली आहे.