अंडी खाताय तर सावधान! जालन्यातील घटनेनं खळबळ, उकडलेल्या अंड्यात निघालं प्लास्टिक

जालना: प्रथिनांनी भरपूर असलेली अंडी खाण्याचा सल्ला नेहमीच आहारतज्ज्ञ आणि डॉक्टर यांच्याकडून दिला जातो. मात्र हीच अंडी आपल्या आरोग्यासाठी हानिकारक ठरू शकतात. जालना शहरात अंड्यामध्ये उकडल्यानंतर चक्क प्लास्टिक सदृश्य पदार्थ निघाला. त्यामुळे एकच खळबळ उडाली आहे. अंड्याच्या बाबतीत घडलेल्या या प्रकाराने अन्न व औषध प्रशासन विभागाच्या कारभारावर प्रश्नचिन्ह उपस्थित झाले आहे.

जालना शहरातील बदर चाऊस यांनी मुलाला देण्यासाठी दुकानातून अंडी खरेदी केली. ही अंडी उकडल्यानंतर थंड झाली तेव्हा मुलाला चावता येईना. तेव्हा बदर चाऊस यांनी हा काय प्रकार आहे याची खातर जमा केली. तेव्हा त्यांना अंड्यामध्ये प्लास्टिक सदृश्य पदार्थ असल्याचं जाणवलं. ही गोष्ट त्यांनी आपल्या आजूबाजूच्या शेजाऱ्यांना सांगितल्यानंतर त्यांनी देखील या प्रकाराची खातरजमा केली. अंड्यामध्ये असणारा हा पदार्थ प्लास्टिक सारखाच असल्याने आणि खाणे योग्य नसल्याने त्यांनी ही अंडी फेकून दिली आहेत. मात्र यामुळे नागरिकांच्या आरोग्याचा प्रश्न ऐरणीवर आलाय.