एकेकाळी होता हॉटेल कामगार, आज झाला हॉटेल मालक, दिवसाला 2 हजारांचा नफा, जालन्यातील व्यक्तीच्या जिद्दीची कहाणी!

नंदकिशोर यांचे शिक्षण बारावीपर्यंत झाले आहे. घरची परिस्थिती सामान्य होती. त्यात वडील ज्यूस सेंटर चालवतात. त्यामुळे शिक्षणानंतर उपजीविकेसाठी त्यांनी 3 ते 4 वर्ष जालन्यातील एमआयडीसीत 350 रुपये प्रति हजेरीवर काम केले. यानंतर शहरातीलच एका हॉटेलमध्येही त्यांनी 3-4 वर्ष काम केले. यावेळी कामगार म्हणून मालक जे सांगेल ते काम करावे लागायचे. त्यामुळे आपणही मालक व्हावे, असे त्यांना वाटायला लागले.

या कामांमध्ये त्याची पत्नीदेखील त्याला खंबीरपणे साथ देत आहे. मंठा चौफुली परिसरात अनेक मोठमोठे हॉस्पिटल आहेत. या हॉस्पिटल मधील रुग्णांचे नातेवाईक चहा, नाश्ता आणि जेवण करण्यासाठी या हॉटेलवर येतात. नाश्त्यासाठी समोसा, ब्रेड वडा, वडापाव तर जेवणासाठी राइसप्लेट आणि वेगवेगळ्या भाज्या ते बनवून देतात. त्यांचा हा हॉटेल व्यवसाय आता चांगलाच भरभराटीस आला असून महिन्यासाठी ते 50 ते 60 हजारांचा नफा कमावत आहेत.

लोकल18 शी बोलताना नंदकिशोर झारखंडे म्हणाले की, संघर्ष म्हणाल तर सांगण्यासारखे खूप आहे. एमआयडीसीत काम करणे असो किंवा हॉटेलमध्ये काम करणे असो, पण कधीतरी मनाला वाटायचे की आपणही मालक व्हावे, म्हणून ही हॉटेल सुरू केली. आता आपले चांगले चालू आहे. 4-5 लोक हाताखाली आहेत. दिवसाला 2 हजार रुपये कसेही उरतात. माझी पत्नीही मला मदत करते. कोणत्याही कामात लाज न बाळगता व्यावसायिक दृष्टिकोनातून व्यवसाय केल्यास तो फायदेशीर ठरतो, या शब्दात त्यांनी आपल्या भावना व्यक्त केल्या.