फिरायला जायचं सांगितलं, आळंदीत नेलं अन् पाहुण्यांच्या मुलीसोबत धक्कादायक प्रकार

अंबड तालुक्यातील एका गावातून फिरायला जायचे म्हणून नात्यातील मुलीला कारमधून सोबत नेले. यानंतर मुलीला आळंदी येथील एका मंदिरात नेण्यात आले. मुलीची इच्छा नसतानाही मुलीला 'लग्न कर, नसता तुला जिवंत मारून टाकू,' अशी धमकी देत बळजबरीने लग्न लावून घेतले. दुसऱ्या दिवशी घरी आल्यानंतर मुलीने आई-वडिलांना हा प्रकार सांगितला. यानंतर मुलीने दिलेल्या फिर्यादीवरून चार जणांविरुद्ध गुन्हा दाखल करण्यात आला आहे. ही घटना अंबड तालुक्यातील एका गावात घडली.

मुलगी ही गेवराई येथे कॉलेजमध्ये शिक्षण घेत आहे. ती 21 जानेवारी रोजी सकाळी 11 वाजता शहागड येथील बसस्थानकात आली होती. याप्रसंगी नातेवाइकांनी तिला त्याच ठिकाणाहून 'आपल्याला फिरायला जायचे आहे' म्हणत कारमध्ये बसवून घेतले. यानंतर आळंदीत नेऊन बळजबरीने एका मंदिरात मुलीचे लग्न लावून घेतले. या लग्नाचे प्रमाणपत्रही संस्थेकडून घेण्यात आले आहे. याप्रकरणी अधिक तपास सुरू आहे.