Ladka Bhau Yojana : शिंदे सरकारने लाडक्या भावांसाठी आणली खास योजना, कोल्हापुरातील तरुणाई काय म्हणाली?

कोल्हापूर : राज्य सरकारने राज्यभरातील सर्व मुली आणि महिलांसाठी काही दिवसांपूर्वीच मुख्यमंत्री माझी लाडकी बहीण योजना जाहीर केली. ही योजना जाहीर झाल्यानंतर राज्यातील सर्वच महिलांनी दर महिन्याला 1500 रुपये मिळणार असल्याने आनंद व्यक्त केला आहे. पण लाडक्या बहिणींनंतर लाडक्या भावांचे काय, असा प्रश्न उपस्थित केला जात होता. याच प्रश्नाला उत्तर देत मुख्यमंत्री एकनाथ शिंदे यांनी आषाढी एकादशीच्या निमित्ताने राज्यभरातल्या विद्यार्थ्यांसाठी एक योजना आणली आहे. एकादशी निमित्त पंढरपूरच्या विठ्ठल मंदिरात शासकीय महापूजा केल्यानंतर मुख्यमंत्र्यांनी लाडका भाऊ योजनेची घोषणा केली आहे. राज्यभरातील मुलांना विद्यार्थ्यांना या योजनेचा लाभ होणार आहे.

मुख्यमंत्र्यांनी घोषणा केलेल्या या नव्या योजनेअंतर्गत आता राज्यभरातील विद्यार्थ्यांना दर महिन्याला पैसे मिळणार आहेत. त्यामध्ये बारावी उत्तीर्ण असणाऱ्यांना दर महिन्याला 6 हजार रुपये, डिप्लोमा पूर्ण केलेल्यांना 8 हजार रुपये आणि पदवीधर तरुणांना 10 हजार रुपये दर महिन्याला दिले जाणार आहेत.