Local Body Election: स्थानिक स्वराज्य संस्था राजकारणात मोठी उलथापालथ होणार, सरकारचा गेमचेंजर निर्णय, कोणाला मिळणार फायदा?

नव्या सुधारणा विधेयकानुसार, आता एकच व्यक्ती एकाच वेळी अध्यक्ष आणि सदस्य अशा दोन वेगवेगळ्या जागांवर निवडणूक लढवू शकेल. इतकेच नाही तर, दोन्ही जागांवर निवडून आल्यास संबंधित व्यक्तीला दोन्ही पदे एकाच वेळी धारण करण्याची मुभा देण्यात आली आहे. यापूर्वी अशा परिस्थितीत एका पदाचा राजीनामा द्यावा लागत असे, मात्र आता दोन्ही पदे कायम ठेवता येणार आहेत.

या दुहेरी पदभारामुळे मतदानाच्या प्रक्रियेत काही विशेष तरतुदी करण्यात आल्या आहेत. संबंधित व्यक्तीला सभागृहात सदस्य म्हणून मतदान करताना केवळ एकदाच मतदान करता येईल.

जर एखाद्या विषयावर मतदान करताना सत्ताधारी आणि विरोधकांची मते समसमान पडली आणि पेचप्रसंग निर्माण झाला, तर अशा वेळी त्या व्यक्तीला अध्यक्ष म्हणून 'निर्णायक मत' (Casting Vote) देण्याचा विशेष अधिकार असेल.

राज्य सरकारच्या या निर्णयामुळे स्थानिक पातळीवर नेत्यांचे वर्चस्व वाढण्यास मदत होणार असल्याचे बोलले जात आहे. विशेषतः लहान नगर पंचायतींमध्ये जिथे संख्याबळाची चुरस असते, तिथे अध्यक्षांना आता अधिक ताकद मिळणार आहे. विरोधक या विधेयकावर काय भूमिका घेतात, याकडे आता सर्वांचे लक्ष लागले आहे.