Mira Bhayandar Marathi Morcha: मीरा रोडवर आंदोलन पेटलं! प्रताप सरनाईकांवर बाटली फेकली, जोरदार घोषणाबाजी

प्रताप सरनाईक हे आपल्या काही कार्यकर्त्यांसह आंदोलनात सहभागी झाले होते. पण, सरनाईक आल्याचे पाहताच त्यांच्याविरोधात घोषणाबाजी सुरू झाली. '50 खोके एकदम ओके', 'जय गुजरात', 'सरनाईक गो बॅक' अशा जोरदार घोषणा देण्यात आल्या. एका अज्ञात व्यक्तीने सरनाईक यांच्या दिशेने पाण्याची बाटली फेकण्यात आली. आंदोलकांचा आक्रमक पवित्रा पाहता सरनाईक यांना आंदोलनाच्या ठिकाणावरून काढता पाय घ्यावा लागला.

आज सकाळी मोर्चा काढण्याआधी मध्यरात्री, पहाटेच्या सुमारास पोलिसांनी मनसे नेते अविनाश जाधव यांना राहत्या घरातून ताब्यात घेतले. त्याशिवाय, मनसे आणि इतर संघटनांच्या पदाधिकार्‍यांना पोलिसांनी ताब्यात घेतले.

मीरा-भाईंदरमधील एका मिठाईच्या दुकानदाराला मनसैनिकांनी मारहाण केली होती. त्याचा व्हिडीओ व्हायरल झाला होता. त्यानंतर 3 जुलै रोजी बिगर मराठी व्यापारी दुकानदारांनी बंद पुकारत मोर्चा काढला होता. या मोर्चात मराठीभाषिकांविरोधातही टिप्पणी करण्यात आली होती. त्यानंतर मनसे नेते अविनाश जाधव यांनी हा मोर्चाला भाजपची फूस असल्याचा आरोप केला. मारहाणी मागील घटना सांगताना मराठी आणि महाराष्ट्राचा अपमान सहन कसा करायचा असा सवाल केला. या मोर्चाविरोधात 8 जुलै रोजी मोर्चा काढणार असल्याचे त्यांनी जाहीर केले होते. त्यानंतर विविध मराठी संघटनांसह आज मनसेने मोर्चाची हाक दिली होती. मात्र, मोर्चा आधीच पोलिसांनी जाधवांना ताब्यात घेतले.