शेवटच्या श्वासापर्यंत समाज प्रबोधन; वारकरी परिषदेच्या बैठकीनंतर घरी परतताना प्रसिद्ध कीर्तनकाराला ट्रकने चिरडलं

नांदेड: कोणता प्रवास कधी शेवटचा ठरेल, हे सांगता येत नाही. याचाच प्रत्यय देणारी एक हृदयद्रावक घटना नांदेडमधून समोर आली आहे. यात आपल्या कीर्तनातून अंधश्रद्धेवर प्रहार करणारे आणि समाजाला सन्मार्ग दाखवणारे प्रसिद्ध कीर्तनकार ह.भ.प. मधुकर महाराज बारूळकर (रा. बारूळ, ता. कंधार) यांचा अपघात झाला. मंगळवारी सायंकाळी झालेल्या या भीषण रस्ते अपघातात त्यांचा दुर्दैवी मृत्यू झाला. नांदेड शहरातील सिडको परिसरात एका भरधाव हायवा ट्रकने त्यांच्या दुचाकीला जोरदार धडक दिली, ज्यामध्ये महाराजांचा जागीच अंत झाला. या घटनेमुळे संपूर्ण मराठवाड्यात हळहळ व्यक्त होत आहे.