जखमी मित्राचा रक्ताअभावी मृत्यू, दशक्रिया विधीला रक्तानेच श्रद्धांजली, मित्रांनी काय केलं?

मयूर कातकाडे याचा 27 मार्च रोजी रात्रीच्या सुमारास केपानगर येथील कृष्ण मंदिराजवळ भीषण अपघात झाला. यामध्ये त्याला गंभीर दुखापत झाली आणि त्यामुळे रक्तस्राव झाला. त्याला तातडीने रुग्णालयात दाखल करण्यात आले. मात्र, वेळेवर रक्त उपलब्ध न झाल्याने मयूरची मृत्यूशी झुंज अपयशी ठरली. मयूरचा मृत्यू रक्ताअभावी झाल्याचे शल्य कुटुंबीय आणि मित्र परिवाराला देखील बोचत होतं. त्यामुळे त्यांनी समाजापुढे आदर्श निर्माण करणारा निर्णय घेतला.

मयूरचा दशक्रिया विधी करण्याऐवजी अशा घटना घडून नयेत म्हणून समाजासाठी काहीतरी करण्याचा निर्णय झाला. त्यानुसार रक्ताअभावी कुणाचे प्राण जाऊ नयेत म्हणून दशक्रिया विधीच्या दिवशीच रक्तदान शिबीर घेण्याचे निश्चित केले.