देशी गाई सांभाळा, अथवा आमच्याकडे द्या! 28 वर्षांपासून नाशिककराची गोसेवा!

नाशिक: मानवी जीवनात आणि हिंदू धर्मात देखील गाईंचं महत्त्व मोठं आहे. त्यामुळेच गाईंची गोमाता म्हणून पूजा देखील केली जाते. परंतु, सध्याच्या काळात देशी गाईंचं संगोपन करण्याचं टाळून त्यांची कत्तल होत असल्याचे प्रकार घडत आहेत. गोमातेचं संरक्षण व गोपालनाचं काम नाशिकमधील राजलक्ष्मी गोशाळेचे संस्थापक किरण पाटील हे गेल्या 28 वर्षांपासून करत आहेत. देशी गोवंशाचं महत्त्व आणि त्याची गरज याबाबत पाटील यांनी लोकल18 सोबत बोलताना माहिती दिलीये.

गोशाळेतील प्रत्येक छोटे-मोठे काम करणारा सदस्य खूप मोठे ‘सत्कर्म’ करत आहे, याची जाणीव प्रत्येकाने ठेवायला हवी. गोशाळेतील काम करणारे सहकारी, गाईची वेळच्या वेळी धार काढणारा मदतनीस, गाईला चारा-पाणी खाऊ घालणारा कामगार असो किंवा गाईचे दूध, दही, तूप घराघरातून पोहचवणारा दूधवाला असेल, प्रत्येक जण खूप महत्त्वाची भूमिका बजावत आहेत, याची दखल घ्यायला हवी. याशिवाय पंचगव्य उत्पादन करणारे उद्योजक आणि त्याची विक्री करणारे व्यावसायिक, हे सर्व फक्त देशी गोवंशाचे संवर्धन करत नाहीत, तर हे गोसेवक राष्ट्र कल्याणासाठी झटत आहेत, असे पाटील सांगतात.