Shirdi Sai Baba Temple: गॅस टंचाईचा शिर्डीला मोठा फटका, साईबाबांचे लाडू प्रसाद अनिश्चित काळासाठी बंद

अमेरिका- इस्राईल विरूद्ध इराणच्या युद्धामुळे संपूर्ण देशभरामध्ये इंधन पुरवठा विस्कळीत झाला आहे. विस्कळीत झालेल्या इंधन पुरवठ्यामुळे साईबाबा मंदिर ट्रस्टने महत्त्वाचा निर्णय घेतला आहे. इंधन पुरवठ्याचा फटका सर्वांप्रमाणेच साईबाबा मंदिरालाही बसत आहे. गॅसच्या टंचाईमुळे मंदिर ट्रस्टने आता भाविकांना विक्रिसाठी उपलब्ध करून देण्यात येणार्‍या लाडू प्रसादाचे उत्पादन अनिश्चित काळासाठी पूर्णपणे बंद करण्याचा निर्णय घेतला आहे. शिवाय, शिर्डीतील साईबाबा संस्थानच्या प्रसादालयात गॅस बचतीसाठी काही महत्त्वाचे निर्णय घेण्यात आले असून प्रसादालयाच्या मेन्यूमध्ये काही बदल करण्यात आला आहे. गॅस टंचाईचा विचार करून संस्थान प्रशासनाने हा महत्त्वाचा निर्णय घेतला.

अवघ्या काही दिवसांवरच रामनवमीचा उत्सव येऊन ठेपला आहे. या उत्सवानिमित्त गॅसचा साठा जपून वापरण्यासाठी संस्थानने कठोर निर्णय घेतला आहे. देशभरामध्ये निर्माण झालेल्या गॅस टंचाईमुळे साईबाबांच्या प्रसादालयामध्ये भाविकांसाठी असणाऱ्या जेवणाच्या मेन्यूमध्ये बदल केला गेला आहे. भाविकांना मिळणाऱ्या जेवणातून एक भाजी कमी केली गेली आहे. उद्यापासून प्रसादालयात डिझेलवर चालणाऱ्या शेगड्या सुरू करण्यात येणार आहेत. भाविकांना दिला जाणारा बुंदी प्रसाद मात्र अद्याप सुरू आहे, पण आता लवकरच तो सुद्धा बंद केला जाणार आहे. कमी गॅस लागणाऱ्या मेन्यूला प्राधान्य दिला जात असून जेवणाच्या मेन्यूमध्ये बदल केला जाणार असल्याचे बोलले जात आहे.