Nashik News: त्र्यंबकेश्वर ज्योतिर्लिंग मंदिरामध्ये दलालांचा सुळसुळाट, दर्शनाच्या नावाखाली भाविकांची लूट

लवकरात लवकर दर्शन मिळावं, यासाठी एजंट भाविकांकडून हजारो रूपये घेतात. मंदिराजवळ गेल्यानंतर गेटवर थांबवून जोडीदाराला बोलावून आणतो, असं म्हणत ती व्यक्तीने तिथून पळ काढला. तो व्यक्ती पुन्हा त्या ठिकाणी येतच नाही. ज्या व्यक्तीसोबत हा प्रकार घडल्यानंतर त्याला आपली फसवणूक झाल्याचं लक्षात आलं. त्याने लगेचच आरडा ओरडा सुरू केला. त्याच्या सोबत घडलेली घटना एका व्यक्तीने शूट केली. हा शूट केलेला व्हिडिओ सध्या सोशल मीडियावर व्हायरल होत आहे. या घटनेचा व्हिडिओ एका भाविकाने व्हायरल केला आहे.

दरम्यान, दोनशे रूपये देणगी दर्शनाचा पास काढूनही भाविकांना तासंतास दर्शनासाठी रांगेमध्ये उभं राहावं लागतं. "वारंवार मंदिर ट्रस्टकडून भाविकांनी दर्शनाच्या नावाखाली दलालांकडून केल्या जाणाऱ्या अमिषाला बळी न पडण्याचे आवाहन केले जाते. तरीही अनेक भाविक दलालांना पैसे देऊन दर्शन करतात. पण त्यामुळे अनेकदा त्यांची फसवणूक होते." अशी प्रतिक्रिया मंदिराच्या विश्वास्तांनी दिली आहे. सुट्टीच्या दिवसांमध्ये त्र्यंबकेश्वरच्या ज्योतिर्लिंग मंदिरामध्ये, मोठ्या प्रमाणावर भाविकांची गर्दी होते. त्यामुळे सुट्टीच्या दिवसांमध्ये दलाल भाविकांकडून मोठ्या प्रमाणावर पैशांची लूट करत असतात.

मंदिराच्या विश्वास्तांनी भाविकांच्या दृष्टीने एक महत्त्वाचा निर्णय घेतला. ते म्हणाले की, " भाविकांच्या दृष्टीने आम्ही महत्त्वाचा निर्णय घेतला आहे. भाविकांचं जलद दर्शन व्हावं यासाठी देवस्थान ट्रस्टकडूनच 2500 रूपये घेऊन 'जलद दर्शन'ची व्यवस्था करण्यात येणार आहे. या व्यवस्थेसाठी मंदिर ट्रस्ट फक्त विचारात आहे, अद्याप निर्णय घेतलेला नाही." भाविकांकडून लवकर दर्शन करून देतो, असं सांगून दलालांकडून होणारी लूट ही काही आत्ताची नाही. यापूर्वीही या घटना अनेकदा घडल्या आहेत. मंदिर देवस्थान ट्रस्टकडे या घटनेची माहिती आली असतानाही मंदिर प्रशासनाने कोणतीही कारवाई केलेली नाही.