दादांचा घात की अपघात? लोकांच्या मनात शंकांचं काहूर, तटकरे-प्रफुल पटेल गप्प का? कराळे मास्तरांचा सवाल

अजित पवार यांच्या विमानाचा अपघात नव्हे तर घातपात झाला आहे, अशी दाट शंका रोहित पवार यांना आहे. अपघाताची चौकशी सीआयडीद्वारे न करता डीजीसीएसह परदेशातील अनुभवी संस्थांकडून करावी, अशी त्यांची मागणी आहे. यासंदर्भाने त्यांनी खळबळजनक दावे करणारी पत्रकार परिषदही मंगळवारी घेतली. अजित पवार यांच्यासोबत विमान अपघातात मृत्यूमुखी पडलेली पिंकी माळी हिचे वडीलही हा अपघात नसल्याचे म्हणत आहेत. हेच संदर्भ देऊन कराळे मास्तरांनी तटकरे-पटेलांना सवाल विचारले.

शरद पवारांच्या तब्येतीची विचारपूस करण्यासाठी नितेश कराळे मास्तर पुण्यात आले होते. यावेळी त्यांनी आपले मत मांडत अजित पवार यांच्या अपघातात आंतरराष्ट्रीय ताकदींचा हात असण्याची शक्यता देखील व्यक्त केली आहे.

दोन्ही राष्ट्रवादी एकत्र येण्याच्या चर्चा सुरू असताना अजितदादांचे अपघाती निधन होणे यावर देखील नितेश कराळे यांनी शंका उपस्थित केली. दोन्ही राष्ट्रवादीच्या विलिनीकरणाची चर्चा अंतिम टप्प्यात असताना नेमका त्याचवेळी अजित पवार यांचा अपघात न पटणारा आहे, असे कराळे म्हणाले. दरम्यान, शरद पवार आपली पुरोगामी भूमिका सोडायला तयार नसल्याने विलिनीकरणाची चर्चा थांबली असावी, असे देखील कराळे मास्तर म्हणाले.

दुसरीकडे सुनील तटकरे यांना अजित पवार यांच्या अपघाताच्या चौकशीच्या अनुषंगाने प्रश्न विचारला. त्यावर अपघाताचे सत्य देशासमोर आले पाहिजे, सखोल चौकशी व्हावी हीच आमची भूमिका असल्याचे तटकरे म्हणाले.