फेकलेले तुकडे घ्यायचे नाहीत ही वडिलांची शिकवण, मुंडेंच्या आठवणीत पंकजा भावुक, लातुरात तडाखेबंद भाषण

शशिकांत पाटील, लातुर : माझे बाबा लोकनेते होते. लाखो लोकांच्या प्रार्थना ऐकून तरी मुंडेसाहेब पुन्हा जिवंत होतील, असे वाटले होते. माझी भाबडी आशा होती, वडिलांचा मृत्यू स्वीकारायला खूप दिवस लागले. जिवंतपणी मुंडे साहेबांनी मला वारस घोषित केले. आयुष्यात काय करायचे हे त्यांनी मला कधीच शिकवले नाही, काय करायचे नाही हे त्यांनी शिकवले, असे भावुक सुरात सांगतच 'कहाँ तुम चले गये?' म्हणत वडिलांच्या आठवणीत पंकजा मुंडे यांच्या डोळ्यात अश्रू तरळले. तसेच संघर्ष करून त्यांनी सगळे काही मिळवले. फेकलेला तुकडा कधीच स्वीकारायचा नाही, असा कानमंत्र त्यांनी दिला. संघर्षाबरोबरच कटकारस्थानही माझ्या वाट्याला आले, असे पंकजा म्हणाल्या.