Nashik: मजुरी करून घरी चालले होते, पिकअप व्हॅनची स्कुटीला धडक, मायलेकाचा जागेवरच मृत्यू, दृश्य पाहून लोक रडले

मिळालेल्या माहितीनुसार,  नाशिक जिल्ह्यातील निफाड तालुक्यात चांदोरी शिवारातून जाणाऱ्या राज्य महामार्ग क्रमांक ३६ वर बुधवारी संध्याकाळी साडेपाच ते सहा वाजेच्या सुमारास ही घटना घडली. चांदोरीकडून ओझरच्या दिशेने स्कुटीवरून जात असलेल्या आई आणि मुलाला मागून येणाऱ्या एका भरधाव पिकअप व्हॅनने जोराची धडक दिली. या अपघातात आई आणि मुलाचा जागेवरच मृत्यू झाला. तर भरधाव पिकअप व्हॅन उलटल्यानंतर कारलाही धडकला.

या अपघातात सिंधुबाई अर्जुन गायकवाड (वय ४२)आणि त्यांचा मुलगा कुणाल अर्जुन गायकवाड (वय १२) या दोघांचाा जागीच मृत्यू झाला. सिंधुबाई या चांदोरी इथं मोलमजुरीचं काम आटोपून आपल्या मुलासह स्कुटीनं घरी जात होत्या. त्याचवेळी मागून येणाऱ्या पिकअप क्रमांक एमएच १८ एए ५२४३ च्या ड्रायव्हरचं गाडीवरील नियंत्रण सुटलं आणि समोर असलेल्या स्कुटीला जोराची धडक दिली. हा अपघात इतका भीषण होता की, स्कुटीसह आई आणि मुलगा रस्त्याच्या बाजूला फेकले गेले. पिकअप व्हॅनची धडक इतक्या जोरात होती की, स्कुटीचा चक्काचूर झाला.

घटनेची माहिती मिळताच पोलिसांनी घटनास्थळी धाव घेतली. दोन्ही अपघातग्रस्त वाहनं बाजूला करण्यात आली. हा अपघातात अतिवेगाने वाहन चालवल्यामुळे घडल्याचं पोलिसांनी सांगितलं. अपघातात आई आणि मुलाचा मृत्यू झाल्यामुळे परिसरात हळहळ व्यक्त केली जात आहे.