'पापा, मी जीव देतोय', वडिलांना शेवटचा कॉल करत तरुणाने उचललं टोकाचं पाऊल, घटना CCTV कॅमेऱ्यात कैद

प्रज्वल सोम ढेंगे (वय २५) असं आत्महत्या करणाऱ्या तरुणाचं नाव आहे. आत्महत्येसारखं टोकाचं पाऊल उचलण्यापूर्वी प्रज्वलनं आपल्या वडिलांना फोन केला होता. "मी आंभोरा पुलावरून उडी मारून जीव देत आहे," असं त्यानं वडिलांना सांगितलं. मुलाचा फोन येताच कुटुंबीयांच्या पायाखालची जमीन सरकली. त्यांनी तातडीनं अड्याळ पोलीस ठाण्यात धाव घेऊन तक्रार नोंदवली आणि घटनास्थळाकडे धाव घेतली.

प्रज्वलने पुलावर गेल्यानंतर काही वेळातच नदीच्या खोल पात्रात उडी घेतली. ही संपूर्ण घटना पुलावरील सीसीटीव्ही कॅमेऱ्यात कैद झाली आहे. पोलिसांनी दिलेल्या माहितीनुसार, प्रज्वलने उडी मारल्यानंतर तो पाण्याचा प्रवाहासोबत वाहून गेल्याची भीती व्यक्त केली जात आहे.

घटनेची माहिती मिळताच पोलीस तातडीने घटनास्थळी दाखल झाले. स्थानिक बचाव पथकाच्या साहाय्याने शोधमोहीम राबवली. मात्र, वैनगंगा नदीतील पाण्याचा वेगवान प्रवाह आणि रात्रीच्या अंधारामुळे शोधकार्यात मोठ्या अडचणी निर्माण झाल्या. काल रात्री उशिरापर्यंत शोध घेऊनही प्रज्वलचा पत्ता लागला नाही. आज सकाळी पुन्हा एकदा शोधमोहीम सुरू करण्यात आली आहे.

प्रज्वलनं हे टोकाचं पाऊल का उचललं, याचं कारण अद्याप स्पष्ट झालेलं नाही. मात्र, तो गेल्या काही दिवसांपासून नैराश्यात असल्याची माहिती समोर येत आहे. पोलीस सध्या या प्रकरणाचा सखोल तपास करत असून, प्रज्वलच्या मित्रपरिवाराची आणि नातेवाईकांची चौकशी केली जात आहे. या घटनेमुळे परिसरात मोठी खळबळ उडाली असून ढेंगे कुटुंबावर दुःखाचा डोंगर कोसळला आहे.