शिंदेसाहेबांनी मला ओरडावं, रागवावं यासाठी काही यंत्रणा... धंगेकरांचा रोख कुणाकडे? अंतर्गत संघर्षाची पुन्हा चर्चा

मुंबई : पुण्यातील जैन बोर्डिंगच्या व्यवहारावरून शिवसेना नेते रविंद्र धंगेकर यांनी केंद्रीय राज्यमंत्री मुरलीधर मोहोळ यांच्याविरोधात भूमिका घेऊन गेली आठवडाभर तीव्र संघर्ष केला. याचे पडसाद राज्य आणि राष्ट्रीय पातळीवरील राजकारणावर देखील उमटले. महायुतीत सगळे काही आलबेल नसल्यानेच पक्षांतर्गत संघर्ष सुरू असल्याची राजकीय वर्तुळात चर्चा झाली. दस्तुरखुद्द अमित शाह यांनाही अंतर्गत संघर्षाची दखल घ्यावी लागली. दुसरीकडे पक्षाविरोधात नाही तर प्रवृत्तीविरोधात बोलतोय असे सांगून मोहोळ यांच्याविरोधातील तलवार म्यान करण्यास धंगेकर यांनी नकार दिला. अखेर जैन बोर्डिंगचा व्यवहार रद्द झाल्यानंतर मंगळवारी रविंद्र धंगेकर यांनी पक्षाचे मुख्य नेते एकनाथ शिंदे यांची भेट घेतली. शिंदेसाहेबांनी मला ओरडावं, रागवावं यासाठी काही यंत्रणा काम करत असल्याचा आरोप धंगेकर यांनी केला. त्यांचा रोख साहजिक भाजपमधील काही लोकांवर होता, हे स्पष्ट आहे.