बदलापूर पुन्हा हादरलं! रिक्षाचालकाकडून 10 वर्षाच्या मुलीचा विनयभंग, मैत्रिणीने डोळ्यात माती फेकली अन्...

मिळालेल्या माहितीनुसार, अवघ्या १० वर्षांची एक मुलगी आपल्या मैत्रिणीसोबत ट्युशनला जात होती. दरम्यान, एका रिक्षाचालकाने मुलीचा हात पकडून तिचा विनयभंग करण्याचा प्रयत्न केला. पीडित मुलीने विरोध करूनही तो नराधम तिचा हात सोडायला तयार नव्हता. अशा अत्यंत भीतीदायक प्रसंगात पीडित मुलीच्या मैत्रिणीने दाखवलेल्या प्रसंगावधानामुळे मोठा अनर्थ टळला. मैत्रिणीने तातडीने रस्त्यावरील माती उचलून रिक्षाचालकाच्या डोळ्यात फेकली. माती डोळ्यात गेल्याने रिक्षाचालकाची पकड ढिली झाली आणि दोन्ही मुलींनी तिथून पळ काढत स्वतःचा जीव वाचवला.

घटनेची माहिती मिळताच बदलापूर पूर्व पोलिसांनी तपासाची चक्रे वेगाने फिरवली. परिसरातील सीसीटीव्ही फुटेज तपासल्यानंतर पोलिसांनी आरोपी रिक्षाचालकाची ओळख पटवली. वरिष्ठ पोलीस अधिकाऱ्यांच्या मार्गदर्शनाखाली पोलिसांनी अवघ्या काही तासांतच आरोपीला अंबरनाथ येथून शोधून काढले आणि त्याच्या मुसक्या आवळल्या.

या प्रकरणाबाबत बदलापूर पूर्व पोलीस ठाण्याचे पोलीस निरीक्षक राजेश गज्जल यांनी सांगितले की, "६ फेब्रुवारी रोजी यासंदर्भात तक्रार प्राप्त झाली होती. घटनेचे गांभीर्य ओळखून पोलिसांनी तातडीने पोक्सो (POCSO) कायद्यांतर्गत गुन्हा दाखल केला आहे. आरोपी सध्या न्यायालयीन कोठडीत आहे.