'31st' ची पार्टी करायला मित्रांसोबत गेला अन् थेट 400 फूट खोल दरीत आढळला, साताऱ्यात युवकासोबत घडलं भयंकर

मिळालेल्या माहितीनुसार, क्षेत्रमाहुली इथे आदित्य कांबळे हा युवक ३१ डिसेंबरच्या निमित्ताने आपल्या मित्रांसोबत कास पठाराकडे जाणाऱ्या रस्त्यावरील एका हॉटेलमध्ये पार्टीसाठी गेला होता. सर्व मित्र जल्लोषात असताना, हॉटेलच्या जवळच असलेल्या दरीचा अंधारात आदित्यला अंदाज आला नाही. चालत असताना अचानक त्याचा पाय घसरला आणि तो 400 फूट खोल दरीत कोसळला. हा सगळा प्रकार पाहून मित्रांचीही बोबडी वळली ते घाबरले.

या घटनेची माहिती मिळताच साताऱ्यातील छत्रपती शिवेंद्रराजे ट्रेकर्सची टीम तातडीने घटनास्थळी पोहोचली. रात्रीची वेळ, कडाक्याची थंडी आणि घनदाट अंधार अशा प्रतिकूल परिस्थितीत ट्रेकर्सनी दरीत उतरण्याचा निर्णय घेतला. दोरखंड आणि टॉर्चच्या मदतीने ४०० फूट खाली उतरून शोध घेतला असता, आदित्य जखमी अवस्थेत सापडला. मोठी कसरत करत ट्रेकर्सच्या कार्यकर्त्यांनी त्याला सुरक्षितपणे दरीतून वर काढले. तब्बल ३ ते ४ तासांच्या थरारानंतर आदित्यला दरीतून बाहेर काढण्यात यश आले.

कास पठारकडे जाताना मित्रांसोबत हॉटेलमध्ये ३१ डिसेंबरची पार्टी करायचा प्लॅन ठरला यावेळी एक स्पॉट बघायला म्हणून सगळे मित्र जात असताना तोल गेला आणि युवक दरीत कोसळल्याचे त्याने सांगितलं. वेळीच मदत मिळाल्याने त्याचा जीव वाचला नाहीतर मोठा अनर्थ घडला असता. दरीतून बाहेर काढल्यानंतर आदित्यला तातडीने सातारा जिल्हा शासकीय रुग्णालयात दाखल करण्यात आले आहे. त्याच्या अंगावर अनेक ठिकाणी जखमा झाल्या असून सध्या त्याच्यावर उपचार सुरू आहेत. या घटनेमुळे परिसरात खळबळ उडाली आहे.