‘मोनूला शिक्षा देऊ नका...’, त्यानं प्रेम केलं, पण तिनं छळलं, चिठ्ठी लिहून तरुणानं सगळंच संपवलं, संभाजीनगरात खळबळ

या प्रकरणात सुसाईड नोटच्या आधारे भाग्यश्री उर्फ मोनु रामचंद्र निळ, जयश्री रामचंद्र निळ (दोघी रा. हास्ता ता. कन्नड), कुलदीप उर्फ तेजस बळीराम निकम (रा. गवाली ता. कन्नड, ह.मु. मिटमिटा पडेगाव), सुमेबोध उर्फ सुमीत कुंडलिक पडघान (रा. पिशोर ता. कन्नड) व गुरुदत्त रासने (रा. पिशोर ता. कन्नड) यांच्याविरोधात हसुल पोलिस ठाण्यात गुन्हा दाखल करण्यात आला आहे.

पिशोर (दिगर) (ता. कन्नड) येथे राहणारे गोरख संगराव शिंदे (60) यांनी याबाबत फिर्याद दिली आहे. फिर्यादीत नमूद केल्याप्रमाणे, त्यांचा मुलगा श्रीकांत उर्फ शक्ती हा मागील दोन वर्षांपासून जाधववाडी भागात राहत होता. तो सायबर सिक्युरिटीशी संबंधित क्लास करत होता. 9 डिसेंबर रोजी रात्री सुमारे 8 वाजता श्रीकांत याने जाधववाडी येथील राहत्या घरात दोरीच्या सहाय्याने गळफास घेतला. घटनेची माहिती मिळताच पोलिसांनी त्याला तातडीने घाटी रुग्णालयात दाखल केले. मात्र उपचार सुरू असतानाच 10 डिसेंबर रोजी पहाटे 1.15 वाजता त्याची प्राणज्योत मालावली.

या घटनेप्रकरणी सुरुवातीला हसुल पोलिस ठाण्यात आकस्मिक मृत्यूची नोंद करण्यात आली होती. मात्र सुसाईड नोट आणि वडिलांच्या तक्रारीनंतर संबंधित व्यक्तींविरुद्ध आत्महत्ये स प्रवृत्त केल्याप्रकरणी गुन्हा दाखल करण्यात आला आहे.