सोलापूर महापौर पदाच्या आरक्षणाची सोडत जाहीर! कुणाच्या गळ्यात पडणार माळ?

महानगरपालिकेच्या निकालांनी  संपूर्ण राज्याचे लक्ष वेधून घेतले आहे. सोलापूरकरांनी यंदा कोणा एका पक्षाला कौल दिला नसून, भाजपच्या बाजूने अक्षरशः विजयाची लाट निर्माण केली आहे. १०२ जागांच्या या सभागृहात भाजपने तब्बल ८७ जागा जिंकून ऐतिहासिक आणि 'एकतर्फी' विजय नोंदवला आहे.

निवडणुकीपूर्वी भाजपने ७५ हून अधिक जागा जिंकण्याचे उद्दिष्ट ठेवले होते. मात्र, निकालांनंतर भाजपची ही घोडदौड ८७ जागांपर्यंत पोहोचली आहे. २०१७ मध्ये भाजपकडे ४९ नगरसेवक होते, मात्र यंदा ही सदस्य संख्या थेट ३८ ने वाढली आहे. केंद्रातील आणि राज्यातील सत्तेचा मोठा फायदा या स्थानिक निवडणुकीत भाजपला मिळाल्याचे स्पष्ट दिसत आहे.

सोलापूरमधील चार आमदार आणि पालकमंत्र्यांनी गेल्या तीन महिन्यांपासून जी मोर्चेबांधणी केली होती, तिला मोठे यश आले आहे. विरोधी पक्षातील (काँग्रेस, राष्ट्रवादी, शिवसेना) अनेक विद्यमान नगरसेवकांना आपल्याकडे खेचून त्यांना उमेदवारी देण्याची भाजपची रणनीती यशस्वी ठरली. जिथे भाजपला सर्व १०२ जागांवर उमेदवार मिळाले, तिथे विरोधकांना साधे उमेदवार शोधण्यासाठीही मोठी कसरत करावी लागली.

एकेकाळी सोलापूरचा गड राखणाऱ्या काँग्रेस आणि राष्ट्रवादीची स्थिती अत्यंत दयनीय झाली आहे. काँग्रेसला केवळ २, तर राष्ट्रवादीला फक्त १ जागेवर समाधान मानावे लागले आहे. शिवसेनेने ४ जागा जिंकल्या असल्या, तरी 'एमआयएम' ८ जागांसह दुसऱ्या क्रमांकाचा मोठा पक्ष म्हणून समोर आला आहे.