Solapur Election : मंत्रिपद दिलं, ताकद दिली पण गोरे 'काठावर पास', सोलापुरात वारं फिरलं; कॉरिडॉर महागात, पंढरपुरात भालकेच सरस!

Solapur Election Result Analysis : प्रितम पंडित (सोलापूर, प्रतिनिधी) : गेल्या काही वर्षांपासून सोलापूर जिल्ह्याचं राजकारण महाराष्ट्रात केंद्रस्थानी राहिलं आहे. त्यात खासकरून मोहिते पाटील यांचं अकलूज चर्चेत राहिल होतं. अशातच सोलापूर जिल्ह्यातील 12 नगरपरिषद निवडणुकीच्या पार्श्वभूमीवर भाजपकडून जिल्ह्यातील अनेक आयाराम गायारामांना भारतीय जनता पक्षात स्थान देण्यात आलं होतं. पालकमंत्री जयकुमार गोरे यांनी आत्मविश्वासाने 12 नगरपरिषदेवर भाजपची नगराध्यक्ष उतरवून ऑपरेशन कमळ राबवलं होतं. पालकमंत्री गोरे यांना अवघ्या चार नगरपरिषदेवर भाजपचे कमळ फुलवता आले. दुसरीकडे निवडणुकीत काँग्रेसचा सुपडासाफ झाला आहे.. जिल्ह्यातील अनेक मातब्बर नेत्यांनी आपला गड राखला आहे. शिवसेना शिंदे पक्षाने जोरदार मुसंडी घेत तीन नगरपरिषदेवर भगवा झेंडा फडकवला आहे तर शिवसेना ठाकरे पक्षाला अंतर्गत समन्वयाचा मोठा फटका बसला आहे. जिल्ह्यातील राजकारणात मोहिते पाटील यांनी अकलूज हा आपला गड मोठ्या फरकाने राखला. त्यामुळे पालकमंत्री जयकुमार गोरे हे काठावर पास झाले आहेत.