नशिबाने केली थट्टा, पण त्याने दगडात घडवला देव, सोलापूरच्या अमोलची कहाणी

सोलापूर : अंगी जर कला असेल तर कोणतीही गोष्ट साध्य करत येते. हे सिद्ध करून दाखविले आहे सोलापूर जिल्ह्यातील अमोल गोटे या तरुणाने. घरातील हलाखीच्या परिस्थितीवर मात करत स्वतः दगडावरील नक्षी काम शिकून आपली एक वेगळीच ओळख निर्माण केली आहे. दगडापासून विठ्ठल रुक्मिणीची मूर्ती, दगडापासून मंदिर बनवणे, ग्राहकांना जे हवं ते नक्षीकाम करून देण्याच काम अमोल गोटे हा तरुण करत आहे.

अमोल नागनाथ गोटे राहणार अक्कलकोट सोलापूर असे या दगडावर नक्षीकाम करणाऱ्या तरुणाचे नाव आहे. अमोल गोटे यांच्या घरची परिस्थिती हालाखीची होती. दहावीपर्यंत शिक्षण घेऊन वडिलांसोबत अमोल हा काम दगडावरील नक्षीकाम करायला जात होता. एका वर्षात अमोल गोटे यांनी काम शिकून घेतले.

दगडापासून मंदिर बनवणे, तुळशी माळ बनवणे, दगडापासून कोणतीही वस्तू बनवण्याची कला अमोल यांनी स्वतःच्या अंगी आत्मसात केली आहे. तुळशी वृंदावन बनवण्याच काम दोन आठवड्यात काम अमोल गोटे यांनी कोल्हापूर येथे जाऊन शिकून घेतले. अमोल गोटे यांना या कामाची मजुरी दिवसाला पंधराशे रुपये मिळते. जर अंगावर काम घेतले तर दोन ते तीन हजार रुपये दिवसाला मजुरी मिळते.

शिक्षण शिकलेल्या तरुणांनी आपल्या अंगी जर कला आत्मसात केले तर नोकरीपेक्षाही जास्त उत्पन्न कमवू शकतो तसेच नोकरी पेक्षा कलेला जास्त किंमत असते आणि स्वतःच्या पायावर स्वतः आपण उभे राहू शकतो. जर नोकरी मिळत नसेल तर तरुणांनी आपल्या अंगी कला आत्मसात करावे आणि त्या कलेचा माध्यमातून आपण जास्तीत जास्त उत्पन्न मिळवावे, असे आवाहन दहावी शिकलेले अमोल गोटे यांनी केले आहे.