आधी रोखठोकपणे फोटो शेअर, टीकेनंतर डिलिट करण्याची वेळ, RSS बैठक हजेरीनंतर सुनेत्रा पवार यांचे अखेर स्पष्टीकरण

मुंबई : फुले शाहू आंबेडकरांच्या विचारांचा वारसा सांगणारे, राज्याचे उपमुख्यमंत्री अजित पवार यांच्या पत्नी, राज्यसभा खासदार सुनेत्रा पवार यांनी राष्ट्रीय स्वयंसेवक संघ अर्थात आरएसएसच्या बैठकीला हजेरी लावल्यावरून त्यांच्यावर जोरदार टीका होत आहे. राष्ट्रीय स्वयंसेवक संघाचे निमंत्रण असूनही अजित पवार आणि पक्षाचे आमदार संघाच्या बौद्धिकांना जात नाही मग सुनेत्रा पवार बैठकीला कशा गेल्या, असा प्रश्न उपस्थित होत असताना त्यांनी एक्स माध्यमावरून पोस्ट करून त्यांची भूमिका स्पष्ट केली आहे. विशेष म्हणजे संघाच्या बैठकीला उपस्थिती लावल्याची माहिती सुनेत्रा पवार यांनी स्वत: पोस्ट करून दिली होती. मात्र टीकेनंतर त्यांना समाज माध्यमांवरून फोटो हटवावे लागले.