अजितदादांच्या अपघातावरून रोहित पवारांना अनेक शंका, सुप्रिया सुळेंनी मात्र नमतं घेतलं, म्हणाल्या मुलांना वाटतं की...

राज्य सरकारने अजित पवार यांच्या अपघाताच्या अनुषंगाने तपासाची घोषणा केली आहे. मात्र पंधरा दिवस झाले तरीही काहीही केले नाही, अशी खंत व्यक्त करीत युरोपियन तपास यंत्रणांकडून चौकशी झाली पाहिजे, अशी मागणी रोहित पवार यांनी पत्रकार परिषदांमधून केली. मात्र रोहित पवार यांच्या मागणीशी सुप्रिया सुळे यांनी काही अंशी असहमती व्यक्त केली.

रोहित पवार यांच्या मागणीवर सुप्रिया सुळे यांना विचारले असता, "त्यांची अस्वस्थता साहजिक आहे, मी समजू शकते. मुलांना असे वाटते की अनेक प्रश्न आहेत, पण त्याची उत्तरे सापडत नाहीयेत. असा अपघात का झाला, कसा झाला? असे अनेक प्रश्न त्यांच्या मनात आहेत. त्याची भावना त्याने पारदर्शकपणे मांडली. त्यानंतर मुख्यमंत्री फडणवीस यांचे चौकशीच्या अनुषंगाने विधान आले की पारदर्शकपणे चौकशी होईल. त्यामुळे आपण चौकशीची वाट पाहूया, असे सुप्रिया सुळे म्हणाल्या.

अपघाताच्या चौकशीच्या अनुषंगाने दादांचे सहकारी बोलत का नाहीत? असे विचारले असता, या प्रश्नाचे उत्तर माझ्याकडे नाही. आमचे कुटुंब अडचणीच्या काळातून चालले आहे. आम्ही एकमेकांना आधार देत पुढे चाललोय, असे सुप्रिया सुळे म्हणाल्या.

दोन्ही राष्ट्रवादीचे विलिनीकरण येत्या आज १२ तारखेला होणार होते असे विचारले असता, आमचे कुटुंब अडचणीच्या काळातून चालले आहे. आज अजितदादा नाही त्यामुळे जुने काही काढायचे नाही, अजितदादांच्या इच्छा आणि आशीर्वादाने जे काही होईल ते पाहूया, असे उत्तर सुप्रिया सुळे यांनी दिले.