Zerodha वर असं काय झालं ज्यामुळे गुंतवणूकदाराचे पैसे बुडाले, काय आहे नेमका प्रकार?

Published by:sachin Salve
trending desk

Last Updated:February 03, 2024 10:23 PM IST

आघाडीची ब्रोकरेज फर्म झिरोधाच्या विरोधात #BoycottZerodha असा ट्रेंड सुरू होता.

मुंबई : आघाडीची ब्रोकरेज फर्म झिरोधाच्या विरोधात 1 फेब्रुवारी रोजी #BoycottZerodha असा ट्रेंड सुरू होता. या बाबत फर्मने म्हटलं आहे की, बॉयकॉट पोस्ट्सपैकी बहुतांशी सोशल मीडिया पोस्ट्स बोटच्या (तुमच्या सिस्टिमवर नियंत्रण मिळवणारा अनाहुत कॉम्प्युटर प्रोग्रॅम) माध्यमातून असल्यासारखं वाटत होतं. मनीकंट्रोलला दिलेल्या ईमेल उत्तरामध्ये फर्म म्हणाली, "गेल्या चार महिन्यांत, आम्हाला काही तांत्रिक अडचणींचा सामना करावा लागला आहे. ज्याची संपूर्ण माहिती आधीच स्टॉक एक्स्चेंजशी शेअर केली गेली आहे. आमच्या वेबसाइटवरील डिस्क्लोजर पेजवरही ती उपलब्ध आहे. हे संपूर्ण प्रकरण एका विशिष्ट ग्राहकासोबत घडलेल्या घटनेवर आधारीत आहे आणि ते सोशल मीडियावर व्हायरल झालं आहे."

फर्म पुढे असं म्हणाली, "आमच्या काही ग्राहकांनी या पूर्वी आमच्याविरोधात असे काही ट्विट केले आहेत. पण, यातील बहुतांशी ट्विट्स आणि पोस्ट्स झिरोधा किंवा मार्केटशी संबंधित नसलेल्या बोट्स व अकाउंट्सवरून आली आहेत."

ब्रोकरेज प्लॅटफॉर्म वापरताना तांत्रिक अडथळे आल्याने जयराज पाटील नावाच्या ट्रेडरचं 37 हजार रुपयांचे नुकसान झालं. त्यानंतर बॉयकॉट झिरोधा हा ट्रेंड सुरू झाला. पाटील यांनी मनीकंट्रोलला सांगितलं की, ट्रेडिंग दरम्यान नवीन पोझिशन्स घेतल्याचं त्यांना दिसलं नाही. नेमकं काय घडले आहे, हे त्यांच्या लक्षात येईपर्यंत त्यांचं मोठं नुकसान झालं होते. त्यावेळी प्लॅटफॉर्मवर एरर मेसेज पाठवूनही त्यांना त्यातून बाहेर पडता आलं नाही.

ब्रोकरेज प्लॅटफॉर्मवर तांत्रिक अडचणींची वाढ आणि व्यापाऱ्यांचं होणारे नुकसान यामुळे, एक्सचेंजेसना इन्व्हेस्टर रिस्क रिडक्शन ऍक्सेस (आयआरआरए) प्लॅटफॉर्म सेट करण्यास सांगितलं होतं. हा प्लॅटफॉर्म ऑक्टोबर 2023 मध्ये लाँच करण्यात आला आहे.

20 डिसेंबर रोजी जेव्हा पाटील यांना समस्येचा सामना करावा लागला तेव्हा ऑप्शन म्हणून आयआरआयएचा अॅक्सेस दिला गेला नव्हता. याबाबत विचारलं असता झिरोधाने म्हटलं आहे की, त्या दिवशी हा तांत्रिक बिघाड वाटला नाही त्यामुळे आयआरआरएमध्ये शिफ्ट होण्याची गरज वाटली नाही.

"ग्राहकांना त्या दिवशी ऑर्डर देण्यात कोणतीही अडचण आली नाही," असं फर्मने म्हटलं आहे. पण, बँक निफ्टी एक्स्पायरीच्या दिवशी ट्विटरवर ब्रोकरेज प्लॅटफॉर्ममध्ये समस्यांची तक्रार करणाऱ्या अनेक पोस्ट समोर आल्या होत्या.

झिरोधाने आपल्या स्टेटमेंटमध्ये म्हटलं आहे की, फक्त प्राथमिक आणि डीआर डेटा सेंटर्सच्या गंभीर बिघाडानंतरच ट्रेडिंग मेंबरद्वारे आयआरआरएची मदत घेतली जाते. सर्व सेगमेंट्समध्ये ट्रेडिंग आयआरआरएकडे शिफ्ट करण्याबाबत अटी आहेत. ट्रेडिंग मेंबर विशिष्ट सेगमेंटसाठी आयआरआरएची विनंती करू शकत नाही. शिवाय, आयआरआरएला फक्त दुपारी एक वाजण्यापूर्वी होणाऱ्या तांत्रिक बिघाडांसाठी (इक्विटी सेगमेंटमधील) पाचारण केलं जातं. मार्केट बंद होण्याच्या किमान 2.5 तास आधी आयआरआरए लागू केला जाऊ शकतो. पाटील यांना दुपारी तीननंतर अडचण आली होती.