का महागली गोरगरिबांची भाकरी? ही आहेत ज्वारीच्या दरवाढीची कारणे, Video

सध्या ज्वारीचे दर वाढण्याचे प्रमुख कारण म्हणजे मागणी इतका पुरवठा बाजारपेठेत होत नाही. तर ज्वारी उत्पादन क्षेत्राची घट हेच पुरवठा कमी होण्याचे कारण आहे. शेतकऱ्यांनी उसाचे पीक घेण्यास सुरुवात केली आहे. त्यामुळे ज्वारीचे उत्पादनच कमी होत आहे. त्यातच निसर्गाच्या अवकृपेमुळे ज्या जोमाने पेरण्या होण्याची गरज होती त्या तितक्या झालेल्या नाहीत. त्यामुळे काही ठिकाणी साठेबाजी देखील झालेली आहे. या सगळ्याचाच परिणाम ज्वारीचा भाव वाढीवर झालेला आहे, असे ज्वारी विक्रेते बबन महाजन यांनी सांगितले.

किरकोळ बाजारपेठेतील दरवाढीबाबत जर विचार केला, ज्वारी किलोमागे 6 ते 8 रुपयांनी महाग झाली आहे. यामध्ये उच्च प्रतीच्या शाळूबरोबरच त्या खालोखाल सर्व ज्वारीचे दर वाढल्याचे पाहायला मिळते. त्यामुळे रोज भाकरी खाणाऱ्या सर्वसामान्य नागरिकांना या दरवाढीचा मोठा फटका सहन करावा लागत आहे, असे मत महाजन यांनी व्यक्त केले.

कोल्हापूरच्या किरकोळ बाजारपेठेत सध्या 1 नंबर ज्वारी अर्थात (शाळू) हे 72 ते 80 रुपये प्रति किलो दरात मिळत आहे. तर महिंद्र ज्वारी 52 रुपये, वसंत ज्वारी 40 रुपये प्रति किलो मिळतेय. त्यामुळे सहसा ग्राहकांनी सध्यातरी ज्वारी खरेदीकडे पाठ फिरवली आहे.