भारताच्या सर्वात मोठ्या IPO ला सेबीकडून हिरवा कंदील, ऑक्टोबरमध्ये पैसे कमवण्याची संधी

गेल्या दोन ते तीन वर्षांच्या कालावधीत भारतामध्ये इन्हिशियल पब्लिक ऑफरिंग (आयपीओ) करणाऱ्या कंपन्यांची संख्या मोठ्या प्रमाणात वाढली आहे. विशेष म्हणजे त्याला गुंतवणुकदारांचा अभूतपूर्व प्रतिसादही मिळाला आहे. गेल्या वर्षभरात विक्रमी गुंतवणूक पाहिलेल्या दलाल स्ट्रीटवर सध्या डझनभर कंपन्या आयपीओ लिस्टिंगसाठी सज्ज आहेत. अशा कंपन्यांमध्ये एका जगप्रसिद्ध कार उत्पादक कंपनीचाही समावेश आहे. या कंपनीचा आयपीओ देशातील सर्वांत मोठा आयपीओ असेल, अशी शक्यता आहे. मार्केट रेग्युलेटर सेबीने 'ह्युंदाई मोटार कंपनी'च्या 25 हजार कोटी सेल ऑफरच्या रेड हेरिंग प्रॉस्पेक्टसला मंजुरी दिली आहे. हा आयपीओ ऑक्टोबरमध्ये लाँच होण्याची शक्यता आहे. ह्युंदाईचा आयपीओ एलआयसीचं 2.7 बिलियन डॉलर्सचं लिस्टिंग रेकॉर्ड मोडू शकतो. ह्युंदाई मोटार ही मूळची दक्षिण कोरियातील ऑटोमोबाईल कंपनी आहे. 'लाइव्ह हिंदुस्थान'ने याबाबत वृत्त प्रसिद्ध केलं आहे.