Shocking :देह विक्रीपेक्षा भयंकर! गरजू महिलांना पैशांचं आमिष, बदलापुरात करवून घेतायेत हे काम, मोठं रॅकेट उघड

बदलापूर परिसरात घरातूनच महिलांची स्त्रीबीज काढून त्यांची बेकायदेशीर विक्री केल्याचा धक्कादायक प्रकार समोर आला आहे. या प्रकरणी बदलापूर पूर्व पोलीस ठाण्यात तीन महिलांविरोधात गुन्हा दाखल करण्यात आला असून पोलिसांनी त्यांना अटक केली आहे. या घटनेमुळे संपूर्ण परिसरात खळबळ उडाली आहे.

मिळालेल्या माहितीनुसार सुलक्षणा जयवंत गाडेकर या महिलेने तिच्या घरात स्त्रीबीज वाढीसाठी वापरली जाणारी इंजेक्शन्स बेकायदेशीररित्या साठवून ठेवली होती. आर्थिक अडचणीत असलेल्या महिलांना पैशांचे आमिष दाखवून त्यांना या प्रक्रियेसाठी तयार केले जात होते. कोणत्याही अधिकृत डॉक्टरांचा सल्ला न घेता सोनोग्राफी करून संबंधित इंजेक्शन्स दिली जात होती.

या इंजेक्शन्समुळे स्त्रीबीजांची वाढ झाल्यानंतर महिलांना IVF किंवा ART सेंटरमध्ये नेले जात होते. तेथे ऑपरेशन थिएटरमध्ये त्यांची स्त्रीबीज काढली जात होती. त्यानंतर या स्त्रीबीजांची बेकायदेशीर विक्री केल्याचा आरोप आहे. या प्रक्रियेत महिलांचे शारीरिक आणि आर्थिक शोषण झाल्याची शक्यता आहे.