CNG Gas: आठवड्याच्या पहिल्याच दिवशी मुंबईकरांचे हाल! CNG पुरवठा बंद, प्रवाशांची मोठी गैरसोय होणार

श्रीकृष्णा औटी, प्रतिनिधी : मुंबईकरांसाठी एक महत्त्वाची बातमी आहे. शहराला मोठ्या प्रमाणात गॅस पुरवठा करणाऱ्या महानगर गॅस लिमिटेडच्या सेवेवर परिणाम झाला आहे. आरसीएफ कंपाऊंडमधील गेलच्या मुख्य गॅस पाइपलाईनमध्ये अचानक मोठा बिघाड झाला. या बिघाडामुळे वडाळा येथील एमजीएलच्या सिटी गेट स्टेशनला होणारा नैसर्गिक वायूचा पुरवठा पूर्णपणे बंद झाला आहे. त्यामुळे, मुंबईत गॅसचा पुरवठा खंडित होणार असून, नागरिकांना आधीच पर्यायी व्यवस्था करावी असं आवाहन करण्यात आलं आहे.