मुंबईकरांसाठी गुड न्यूज, नवीन वर्षात वाहनांचा प्रवास सुसाट होणार, कोस्टल रोडचा अंतिम टप्पा लवकरच सेवेत येणार

जानेवारी 2025 च्या पहिल्या आठवड्यापर्यंत अंतिम टप्पा मार्गी लागून वाहनचालकांच्या सेवेत येणार आहे. त्यामुळे मरिन ड्राइव्ह ते वांद्रे-वरळी अप आणि डाऊन मार्गावर वाहनांचा प्रवास सुसाट होणार आहे. मुंबई सागरी किनारा मार्ग हा प्रिन्सेस स्ट्रीट उड्डाणपूल ते वांद्रे-वरळी सी लिंकच्या वरळी टोकापर्यंत बांधण्यात येत आहे.

हा मुंबईचा महत्त्वाचा प्रकल्प सुरू झाल्यानंतर दक्षिण मुंबईतील वाहतूक सुरळीत होण्यास मदत होणार आहे. तसेच 34 टक्के इंधन बचत आणि 70 टक्के वेळेची बचतही होणार असल्याचा दावा मुंबई पालिकेने केला आहे. पहिला टप्प्यात प्रियदर्शनी ते मरिन ड्राइव्हपर्यंत साडेतीन किलोमीटर लांबीचा बोगदाही सेवेत येणार आहे. त्यामुळे वरळी सी फेस ते मरिन ड्राइव्ह असा सध्या अर्धा ते पाऊण तासांचा असलेला प्रवास दहा ते पंधरा मिनिटांत होणार आहे. या बोगद्यातून साधारण तीन ते चार मिनिटांत प्रवास पूर्ण होईल.