Mumbai News: फुटपाथ अडवणाऱ्यांवर मुंबई पालिकेची कडक कारवाई, कांदिवलीत 'करेक्ट कार्यक्रम'

कांदिवलीतील विश्वकर्मण्ये चौक (लोखंडवाला सर्कल) परिसरातील अनधिकृत फेरीवाल्यांवर बीएमसीच्या आर (दक्षिण) विभागाकडून काल (शनिवार- 7 मार्च) निष्कासनाची कारवाई करण्यात आली. महापालिका कर्मचाऱ्यांकडून आणि अधिकाऱ्यांकडून कारवाई केली जात असताना जमावाकडून त्यांना मारहाण करण्यात आली. इतकंच नाही तर, फेरीवाल्यांकडून संयंत्रे आणि वाहनांची तोडफोड करण्यात आली. या पार्श्वभूमीवर, बीएमसीचे आयुक्त भूषण गगराणी यांनी आज (रविवार- 8 मार्च) कांदिवलीतील विश्वकर्मण्ये चौक (लोखंडवाला सर्कल) परिसरात भेट देऊन पाहणी केली. रस्त्यावर उभी करण्यात आलेली वाहने, फेरीवाल्यांमुळे आणि अनधिकृत दुकानदारांमुळे फुटपाथवर निर्माण होत असलेले अडथळे हे महानगरपालिका आयुक्त गगराणी यांनी प्रत्यक्ष उभे राहून निष्कासित करण्याचे आदेश दिले. सोबतच, फुड डिलिव्हरी करणाऱ्या दुचाकी उभ्या करून वाहतुकीला अडथळा निर्माण करणाऱ्या पिझ्झा दुकानाला तात्काळ बंद करण्याचेही निर्देश दिले.