Mumbai Ganeshotsav 2025 : आकर्षक डिझाईन्स आणि परवडणारे दर; दादरमध्ये सजावट खरेदीसाठी गणेशभक्तांची तुफान गर्दी

दादर येथील विविध दुकानांत लाकूड, सनबोर्ड, फोम, कपडा, आरसा, चटई, रबर शीट आणि कृत्रिम फुले यांसारख्या साहित्यांचा वापर करून सुंदर कलाकृतीतून सजवलेली मखर मोठ्या प्रमाणावर उपलब्ध आहेत. हरदेव आर्टचे मालक रुणा दबडे यांच्या मते, सध्या सर्वाधिक लोकप्रियता मिळवत असलेले मखर म्हणजे वॉटर फॉल देखावा असलेले डिझाईन्स आहेत. या मखरांमध्ये नंदीच्या मुखातून पडणारे पाणी, पिलरमध्ये तयार केलेले वॉटर फॉल, तसेच लाइट ऑन-ऑफ होऊन दिसणारे मॅजिक ‘ॐ’ असे वैशिष्ट्यपूर्ण प्रयोग केलेले आहेत.

याशिवाय, विविध मंदिरांच्या प्रतिकृती स्वरूपातील मखरांनाही मोठी मागणी आहे. बालाजी मंदिर, दीपमाळ मंदिर, शिश महल, मोर आसन, मीनाक्षी टेम्पल, गोल घुमट, प्राचीन टेम्पल, भष्ट विनायक मंदिर यांसारख्या कलाकृती ग्राहकांचे विशेष लक्ष वेधून घेत आहेत. प्रत्येक मखर वेगवेगळ्या आकारात, डिझाईनमध्ये आणि बजेटनुसार उपलब्ध आहे, ज्यामुळे ग्राहकांना त्यांच्या गरजा आणि आवडीनुसार निवड करता येते.

किंमतींच्या बाबतीत, सजावटीसाठी एक फुटापासून ते साडेतीन फुटांपर्यंतच्या मूर्तींसाठी मखर उपलब्ध आहेत. साध्या डिझाईनचे मखर सुमारे 1,200 रुपयांपासून सुरू होऊन आकर्षक, जटिल कलाकृती व विशेष लाइट-इफेक्ट असलेले मखर 25 हजार रुपयांपर्यंत विकले जात आहेत. त्यामुळे प्रत्येक बजेटमधील ग्राहकांसाठी काही ना काही पर्याय उपलब्ध आहेत.

गणपती सजावटीसाठी लागणारे इतर साहित्यही या बाजारपेठेत सहज मिळत आहे. कृत्रिम फुलांच्या माळा, तोरणे, फ्लॉवर स्टँड, विविध प्रकारचे देखावे, तसेच मखर. सर्व काही एका ठिकाणी मिळत असल्याने ग्राहकांचा वेळ व श्रम दोन्ही वाचत आहेत.

गणेशोत्सव जसजसा जवळ येत आहे, तसतशी खरेदीची लगबग वाढत चालली आहे. दादर बाजारपेठेत सकाळपासून रात्रीपर्यंत ग्राहकांची मोठी गर्दी होत असून, अनेक जण आपल्या घरच्या बाप्पासाठी सर्वात सुंदर, अनोखे आणि पर्यावरणपूरक मखर निवडण्यासाठी उत्साहाने खरेदी करताना दिसत आहेत. दुकानदारांसाठीही हीच सर्वाधिक व्यस्त वेळ असून, नव्या डिझाईन्स दाखवणे, ग्राहकांच्या आवडीप्रमाणे बदल करणे आणि ऑर्डर्स वेळेत पूर्ण करणे या कामात ते गुंतलेले आहेत.

सणाच्या उत्साहात, पर्यावरणाची काळजी घेण्याचा संदेशही या पर्यावरणपूरक मखरांमधून दिला जात आहे.भव्य सजावट करतानाही निसर्गाला हानी न पोहोचवता गणपती बाप्पाचे स्वागत करण्याचा हा प्रयत्न यंदा अधिकाधिक लोकांना आवडत आहे. त्यामुळे, दादर बाजारपेठ सध्या केवळ खरेदीचे केंद्र नसून, गणेशोत्सवाच्या रंगतदार तयारीचे आणि पर्यावरणपूरक सण साजरा करण्याच्या चळवळीचेही केंद्रबिंदू ठरली आहे.