गॅस बिलाचे 1 हजार भरायला गेला मुंबईचा व्यावसायिक; पण एक क्लिक अन् मोठा गेम, ही चूक करू नका

मुलुंड पश्चिम येथे राहणारे व्यावसायिक मितुल दोशी (वय 40) यांना 26 मार्च रोजी सकाळी मोबाईलवर एक संदेश आला. त्यामध्ये गॅस बिल न भरल्यास कनेक्शन तोडण्यात येईल, अशी सूचना देण्यात आली होती. त्यामुळे घाबरलेल्या दोशी यांनी तत्काळ गुगल पेद्वारे 1,150 रुपये भरले.

यानंतर सायंकाळच्या सुमारास एका अज्ञात व्यक्तीने त्यांना फोन करून स्वतःला गॅस कंपनीचा प्रतिनिधी असल्याचे सांगितले. त्याने पेमेंटचा स्क्रीनशॉट मागितला. दोशी यांनी तो पाठवल्यानंतर पेमेंट अपडेट झालेले नाही असे सांगत त्या व्यक्तीने एक एपीके फाईल पाठवली आणि ती इन्स्टॉल करून त्यात माहिती भरण्यास सांगितले.

दोशी यांनी दिलेल्या सूचनांप्रमाणे माहिती भरताच काही मिनिटांतच त्यांच्या आणि त्यांच्या पत्नीच्या बँक खात्यांतून संशयास्पद व्यवहार सुरू झाले. पाहता पाहता त्यांच्या खात्यातून तब्बल 11.82 लाख रुपये विविध खात्यांमध्ये ट्रान्सफर करण्यात आले. घडलेला प्रकार लक्षात येताच दोशी यांनी तात्काळ बँकेशी संपर्क साधून दोन्ही खाती गोठवली. याप्रकरणी सायबर पोलिसांकडे तक्रार दाखल करण्यात आली असून पुढील तपास सुरू आहे.

दरम्यान, अशा प्रकारच्या बनावट अॅप आणि फोन कॉलद्वारे होणाऱ्या फसवणुकीपासून सावध राहण्याचे आवाहन पोलिसांनी नागरिकांना केले आहे. कोणतीही एपीके फाईल डाउनलोड करू नये, तसेच वैयक्तिक आणि बँकिंग माहिती कोणालाही देऊ नये, असेही पोलिसांनी स्पष्ट केले आहे.