Mumbai News : शतपावली करण्यासाठी बाहेर पडणं बेतलं जिवावर, महिलेची निर्घृण हत्या; कारण आले समोर

अमीनाबी सिद्दीकी या रायझिंग सिटीमध्ये कुटुंबासह राहत होत्या. 24 डिसेंबर रोजी रात्री त्या नेहमीप्रमाणे घराबाहेर फेरफटका मारण्यासाठी निघाल्या. मात्र बराच वेळ होऊनही त्या घरी परतल्या नाहीत. कुटुंबीयांनी परिसरात शोध घेतला असता काहीच माहिती मिळाली नाही. अखेर त्यांनी पंतनगर पोलीस ठाण्यात तक्रार दाखल केली.

तपासादरम्यान मोहम्मद इरफान उर्फ चांद फकरे आलम अन्सारी (वय40) याच्यावर संशय आला यानंतर चौकशीत त्याने गुन्ह्याची कबुली दिली. अमीनाबी यांनी आरोपीच्या पत्नीकडून 3 लाख रुपये उसने घेतले होते. ते पैसे परत न मिळाल्याने आरोपीच्या मनात राग होता. याच रागातून त्याने रात्री पाळत ठेवून अमीनाबी यांचा खून केल्याचे उघड झाले. सध्या या आरोपीला न्यायालयाने सात दिवसांची पोलीस कोठडी सुनावली आहे. या घटनेमुळे परिसरात भीतीचे वातावरण असून महिलांच्या सुरक्षेचा प्रश्न पुन्हा ऐरणीवर आला आहे.