Mumbai Local: सेंट्रल-हार्बर लाईन कनेक्ट होणार, कर्जत-पनवेल लोकल कधी धावणार? महत्त्वाचं अपडेट

सुमारे 29 किलोमीटर लांबीचा हा मार्ग मुंबई रेल्वे विकास महामंडळ आणि मध्य रेल्वे यांच्या संयुक्त विद्यमाने उभारला जात आहे. कर्जत, चौक, मोहोपाडा, रसायनी आणि पनवेल अशी स्थानके या मार्गावर असणार आहेत. प्रकल्पांतर्गत बोगदे, पूल आणि ट्रॅक टाकण्याची कामे प्रगत अवस्थेत पोहोचली आहेत. सिग्नलिंग व इंटरलॉकिंग प्रणालीची उभारणीही अंतिम टप्प्यात असून तांत्रिक चाचण्यांनंतर मार्ग सुरू करण्याची तयारी केली जात आहे. अधिकृत तारीख जाहीर नसली तरी वर्षाअखेरीस सेवा सुरू होण्याची शक्यता व्यक्त होत आहे.

कर्जत लोकल सुरू झाल्यानंतर पनवेल स्थानक सेंट्रल आणि हार्बर मार्गांना जोडणारे महत्त्वाचे इंटरचेंज ठरणार आहे. त्यामुळे स्थानकावर मोठ्या प्रमाणावर विस्तारकामे हाती घेण्यात आली आहेत. लोकल प्लॅटफॉर्मची लांबी वाढवून भविष्यातील 12 डब्यांच्या गाड्यांसाठी नियोजन केले जात आहे. प्लॅटफॉर्मची उंची सुधारली जात असून प्रवाशांच्या सुरक्षिततेला प्राधान्य दिले जात आहे. वाढत्या प्रवासी संख्येचा विचार करून स्थानकाची रचना अधिक सक्षम केली जात आहे.

पनवेल स्थानकावर नव्या पादचारी पुलाचे बांधकाम वेगाने सुरू आहे. हा पूल विविध प्लॅटफॉर्मना जोडणार असून गर्दीचे व्यवस्थापन अधिक सुलभ करणार आहे. पुलावर लिफ्ट आणि एस्कलेटरची सुविधा असणार आहे. त्यामुळे ज्येष्ठ नागरिक, दिव्यांग आणि महिला प्रवाशांना मोठा दिलासा मिळणार आहे. भविष्यातील प्रवासी वाढ लक्षात घेऊन सुविधा उभारण्यात येत आहेत.

नवी मुंबई आंतरराष्ट्रीय विमानतळाच्या पार्श्वभूमीवर या मार्गाचे रणनीतिक महत्त्व वाढले आहे. कर्जत आणि आसपासच्या परिसराला नवी मुंबईशी थेट रेल्वे संपर्क मिळाल्यास प्रवासाचा कालावधी कमी होईल आणि औद्योगिक तसेच निवासी विकासाला चालना मिळेल. एकूणच, कर्जत–पनवेल जोडमार्ग सुरू झाल्यानंतर सेंट्रल आणि हार्बर रेल्वे नेटवर्क अधिक सक्षम होणार असून उपनगरी प्रवाशांसाठी हा प्रकल्प मोठा दिलासा ठरणार आहे.