Western Railway Block: पश्चिम रेल्वेवर शनिवार- रविवार असणार लोकलचा खोळंबा, बांद्रा टर्मिनससह 'या' मार्गिकेवर असणार मेगाब्लॉक

पश्चिम रेल्वेकडून मुंबई आणि उपनगरीय लोकल सेवांबाबत माहिती देताना स्पष्ट केले की, 4 एप्रिल आणि 5 एप्रिल रोजी महत्त्वाच्या मार्गांवर एक मोठा वाहतूक आणि मार्गांवरील देखभालीच्या कामांसाठी ब्लॉक जाहीर केला आहे. एका अधिकृत निवेदनानुसार, वांद्रे टर्मिनसच्या पाचव्या मार्गिकेवर 4 एप्रिल रोजी सकाळी 10 वाजल्यापासून ते 5 एप्रिल रोजी रात्री 10 वाजेपर्यंत जम्बो मॅगाब्लॉक घेतला जाणार आहे. पश्चिम रेल्वेच्या अधिकाऱ्यांनी दिलेल्या माहितीनुसार, मुंबईतील उपनगरीय रेल्वे नेटवर्कवर महत्त्वपूर्ण पायाभूत सुविधांची कामे सुलभ करण्यासाठी आणि रेल्वे वाहतुकीची दीर्घकालीन सुरक्षितता आणि कार्यक्षमता सुनिश्चित करण्यासाठी हा विस्तारित ब्लॉक आवश्यक आहे.

पुढे रेल्वे अधिकाऱ्यांनी दिलेल्या माहितीनुसार, या विभागातील एक महत्त्वपूर्ण रचना असलेल्या पुलाच्या कल्व्हर्ट क्रमांक 22 चे विस्तारीकरणाचे काम करण्यासाठी काम हाती घेण्यात आले आहे. वांद्रे टर्मिनस आणि वांद्रे स्थानकांदरम्यान असलेला लेव्हल क्रॉसिंग क्रमांक 18 पर्यंत पूर्णपणे काम बंद असणार आहे. जम्बो ब्लॉकच्या कालावधीत तो संपूर्ण पट्टा रेल्वे वाहतुकीसाठी पूर्णपणे बंद राहील. या मार्गाचा वापर करणाऱ्या प्रवाशांना आणि वाहनचालकांना गैरसोय टाळण्यासाठी पर्यायी मार्गांचा अवलंब करण्याचा सल्ला देण्यात आला आहे. अधिकाऱ्यांनी यावर जोर दिला की, सार्वजनिक सुरक्षितता किंवा बांधकामाच्या गुणवत्तेशी तडजोड न करता काही ठराविक काळासाठी काम बंद ठेवणे महत्त्वाचे असणार आहे.

याव्यतिरिक्त, पश्चिम रेल्वेने मुंबई सेंट्रल ते माहिम स्थानकांदरम्यान देखभालीच्या कामांसाठी जम्बो ब्लॉक घेण्यात येणार आहे. मिळालेल्या अधिकृत माहितीनुसार, मुंबई सेंट्रल ते माहिम स्टेशनदरम्यान रात्रकालीन ब्लॉक घेतला जाणार आहे. हा ब्लॉक 4 एप्रिल आणि 5 एप्रिलच्या मध्यरात्री घेतला जाणार आहे. मध्यरात्री 12:15 ते पहाटे 04:15 पर्यंत राबवला जाणार आहे. या चार तासांत, एकाच वेळी अनेक देखभालीचे कामे केले जाणार आहेत. रेल्वे प्रशासनाने दिलेल्या माहितीनुसार, गर्दीच्या वेळी प्रवास करणाऱ्या प्रवाशांना होणारा त्रास कमी करण्यासाठी, त्याच वेळी आवश्यक दुरुस्ती आणि सुधारणांची कामे मर्यादित वेळेत कार्यक्षमतेने पूर्ण करता यावीत, यासाठी रात्रीच्या ब्लॉकचे नियोजन करण्यात आले आहे.

बांद्रा टर्मिनसवर घेतल्या जाणाऱ्या ब्लॉकच्या काळात इतर रेल्वे वाहतुकीवर लक्षणीय परिणाम होणार आहे. सांताक्रूझ आणि चर्चगेट स्थानकांदरम्यान सर्व जलद मार्गावरील उपनगरीय लोकल धीम्या मार्गावर वळवण्यात येतील, ज्यामुळे प्रवाशांना थोडासा उशीर होण्याची शक्यता आहे. देखभाल कामामध्ये विश्वसनीयता आणि परिचालन सुरक्षितता वाढवण्यासाठी रूळमधील दुरूस्ती, सिग्नलिंग प्रणाली आणि ओव्हरहेड विद्युत उपकरणांचे काम या काळात हाती घेतले जाणार आहे. या कालावधीत रेल्वेच्या वेळापत्रकात आणि मार्गांमध्ये तात्पुरते बदल अपेक्षित असल्याने, प्रवाशांना त्यांच्या प्रवासाचे नियोजन करण्याचा आणि अधिकृत घोषणांवर लक्ष ठेवण्याचा जोरदार सल्ला देण्यात आला आहे. नेहमीच्या वेळेपेक्षा काही वेळ आधीच घरातून निघण्याचा सल्ला प्रवाशांना देण्यात आला आहे.