धावणाऱ्या मुंबईत इथं मिळेल शांतता! गोरेगावमधील प्रसिद्ध उद्यान पाहिलं का?

मुंबई: कधीही न थांबणाऱ्या मुंबई सारख्या शहरात आपल्याला माणसं नेहमीच एका ठिकाणाहून दुसऱ्या ठिकाणी प्रवास करताना दिसतात. सध्या या धावपळीच्या जीवनात प्रत्येकाला एक शांततेचे ठिकाण हवं असतं. मुंबईत जर शांतता शोधायची असेल तर उद्यान हा उत्तम पर्याय आहे. मुंबईमध्ये आपल्याला अनेक उद्यानं पाहायला मिळतात. पण चारही बाजूने झाडे झुडपे आणि हिरवळ तसेच मोठा परिसर लाभलेली उद्यानं फार कमी पाहायला मिळतात.

मुंबईतील मुख्य उद्यानांपैकी मोठा परिसर लाभलेलं एक उद्यान म्हणजे शिला रहेजा उद्यान होय. गोरेगाव पूर्वेकडील शिला रहेजा उद्यान गोरेगावकरांसाठी एक विरंगुळा केंद्र म्हणून उत्तम ठिकाण आहे. गोरेगावमधील अनेक नागरिकांसाठी व्यायाम किंवा लहान मुलांना खेळण्यासाठी ही जागा एक चांगला परिसर आहे. या ठिकाणी दररोज संध्याकाळी ज्येष्ठ नागरिक शतपावली करण्यासाठी येतात, तर रविवारी किंवा सुट्टीच्या दिवशी अनेक पालक लहान मुलांना खेळण्यासाठी आवर्जून आणतात.