मुंबईत पहिल्यांदाच असं घडलं, 33 वर्षांच्या तरुणानं 9 वर्षांच्या चिमुकल्यासह एकाचवेळी चौघांना दिलं जीवदान

ठाण्यातील महावीर जैन रुग्णालयात २८ मार्च रोजी हे अवयवदान करण्यात आलं. यकृत स्प्लिट करणं शक्य झालं. याचा एक भाग केईएममधील ९ वर्षांच्या मुलाला देण्यात आला, तर दुसरा भाग नवी मुंबईतील अपोलो रुग्णालयातील एका रुग्णाला प्रत्यारोपित करण्यात आला. केईएममधील विल्सन डिसीज या दुर्मिळ आजाराने ग्रस्त होता, ज्यावर यकृत प्रत्यारोपण हाच एकमेव उपाय होता. नॅशनल रेअर डिसीज फंडातून हा संपूर्ण उपचार विनामूल्य करण्यात आला.

अवयव वेळेत पोहोचवण्यासाठी मुंबई, ठाणे आणि नवी मुंबई वाहतूक पोलिसांची मोठी भूमिका होती. महावीर जैन रुग्णालयापासून चार वेगवेगळ्या रुग्णालयांपर्यंत ग्रीन कॉरिडॉर तयार करण्यात आले होते. तरुणाचं हृदय ठाणे ते गिरगाव (३७ किमी) हे अंतर अवघ्या ३१ मिनिटांत कापून एच.एन. रिलायन्स रुग्णालयात पोहोचवण्यात आले. किडनी आणि स्वादुपिंड नानावटी रुग्णालयात २७ किमी अंतर पार करून ३२ मिनिटांत पोहोचवण्यात आलं. यकृत आणि किडनी केईएम रुग्णालयात २७ किमी अंतर अवघ्या २६ मिनिटांत पोहोचवलं. यकृत अपोलो रुग्णालय नवी मुंबई ३४ मिनिटांत पोहोचवण्यात आलं.

या संपूर्ण प्रक्रियेत ४० डॉक्टरांचे पथक रात्रंदिवस काम करत होते. महावीर जैन ट्रस्टचे अध्यक्ष अजय आशर यांनी सांगितले की, "तरुण मुलाच्या निधनानंतर कुटुंबाशी अवयवदानावर चर्चा करणे कठीण होते, परंतु त्यांनी दाखवलेल्या धैर्याला आमचा सलाम आहे." या दात्यामुळे हृदय, फुफ्फुस, किडनी आणि स्वादुपिंड यांसारख्या अवयवांचे यशस्वी प्रत्यारोपण झाले असून, हाडे आणि डोळ्यांच्या दानामुळे भविष्यात अनेकांचे जीवन सुसह्य होणार आहे.