कोकणकन्येनं करुन दाखवलं!, दुबईत झाली घोषणा, सिंधुदुर्ग जिल्ह्यातली शेफाली बनली पहिली "गल्फ सुपर शेफ"

गेले काही दिवस सेलिब्रिटी शेफच्या उपस्थितीत विविध फेऱ्यांमधून पहिल्या सर्वोत्तम 12 शेफची निवड करण्यात आली. सलग 3 दिवस विविध फेऱ्यांमधून पहिल्या टप्प्यात 8 आणि नंतर अंतिम 3 शेफची निवड करण्यात आली. पंचतारांकित पदार्थांपासून स्ट्रीट फूड अशा विविध फेऱ्या जागतिक दर्जाच्या शेफकडून या स्पर्धेदरम्यान घेण्यात आल्या.

रविवारी 6 ऑक्टोबरला सायंकाळी दुबई मध्ये झालेल्या ग्रँड फिनालेमध्ये अंतिम 3 स्पर्धकांमध्ये शेफाली खांबकर निवडली गेली होती. या ग्रँड सोहळ्यात शेफाली खांबकर पहिली गल्फ शेफ बनल्याची घोषणा करण्यात आली. सेलिब्रिटी शेफ कुणाल कपूर यांच्या हस्ते शेफाली हिला गल्फ शेफ ट्रॉफी, प्रमाणपत्र, भेटवस्तू देऊन सन्मानित करण्यात आले. गल्फमध्ये झालेल्या या पहिल्या भव्यदिव्य स्पर्ध्येत अव्वल ठरत एका कोकणकन्येने गल्फ मधील या मानाच्या चषकावर आपले नाव कोरल्यामुळे तिचे विशेष अभिनंदन होत आहे.

शेफाली  वेंगुर्ल्यातील ज्येष्ठ नाट्यकर्मी सुरेंद्र उर्फ बाळू खांबकर आणि सेवानिवृत्त शासकीय कर्मचारी संध्या खांबकर यांची कन्या आहे. शेफालीच्या या यशानंतर मुलीच्या पाठीशी खंबीरपणे उभे राहिलेल्या तिच्या आईवडिलांचेही विशेष अभिनंदन केले जात आहे.