India China : सीमेवर तणाव, पाकिस्ताननंतर आता चीनला मस्ती, भारताला डिवचलं!

चीनने पुन्हा एकदा भारताविरुद्ध कट रचण्याचा प्रयत्न केला आहे. पाकिस्तानसोबतच्या तणावादरम्यान अरुणाचल प्रदेशातील काही ठिकाणांची नावे बदलण्यात आली आहेत. या मुद्द्यावर भारताने चीनला चोख प्रत्युत्तर दिले आहे. भारताने बुधवारी चीनच्या प्रयत्नांना स्पष्टपणे विरोध केला. चीनच्या अशा हास्यास्पद प्रयत्नांनी अरुणाचल प्रदेश भारताचा भूभाग असल्याचे सत्य बदलणार नसल्याचे त्यांनी म्हटले.

अरुणाचल प्रदेशच्या मुद्द्यावर भारताने चीनला सुनावले. "सत्य बदलणार नाही. अरुणाचल प्रदेश राज्य भारताचा अविभाज्य भाग होते, आहे आणि राहील, असे भारताने ठणकावले. अरुणाचल प्रदेशातील काही ठिकाणांसाठी चीनने आपली नावे जाहीर केल्यावर भारताने आपली संतप्त प्रतिक्रिया नोंदवली. अरुणाचल प्रदेश हा तिबेटचा दक्षिण भाग असल्याचा चीनचा दावा आहे.