Ratan Tata: मृत्यूनंतर कोणावर शासकीय इतमामात अंत्यसंस्कार केले जातात? काय आहेत नियम?

जेव्हा एखादा सैनिक शहीद होतो तेव्हा त्याला भारताच्या तिरंग्यात लपेटून शासकीय इतमामात त्याच्यावर अंत्यसंस्कार केले जातात. त्याचबरोबर सीआरपीएफ, बीएसएफ, पोलिस शहीद झाल्यानंतर त्यांनाही तिरंग्यात लपेटून शासकीय इतमामात त्यांच्यावर अंत्यसंस्कार केले जातात. याशिवाय काही विशेष प्रसंगी सरकारी अधिकारी, तसेच कर्मचारी यांचे देशाची सेवा करताना निधन झाल्यास त्यांच्यावरही शासकीय इतमामात अंत्यसंस्कार केले जातात. तथापि याबाबतच्या नियमांमध्ये काही बदल करण्यात आले आहेत. याआधी राजकारणी किंवा सैन्याचे सैनिक यांनाच त्यांच्या निधनानंतर तिरंग्यामध्ये लपेटण्याचा सन्मान मिळतो. मात्र आता व्यक्तीचे पद आणि त्याने देशासाठी काय केले आहे हे पाहून त्यांना हा सन्मान दिला जातो. राजकारण, साहित्य, कायदा, विज्ञान, उद्योग आणि मनोरंजन या क्षेत्रांमध्ये विशेष कामगिरी केलेल्या व्यक्तींनाही त्यांच्या मृत्यूनंतर हा सन्मान दिला जातो.