दूरदर्शनचा सुवर्ण आवाज हरपला; सरला माहेश्वरी काळाच्या पडद्याआड, वयाच्या 71 व्या वर्षी दिल्लीत घेतला अखेरचा श्वास

दूरदर्शन न्यूज (DD News) ने सोशल मीडिया प्लॅटफॉर्म ‘एक्स’वर पोस्ट करत त्यांना आदरांजली वाहिली. डीडीने आपल्या संदेशात म्हटले आहे की, “सरला माहेश्वरी या दूरदर्शनच्या आदरणीय आणि प्रतिष्ठित वृत्तनिवेदिका होत्या. आपल्या सौम्य आवाज, स्पष्ट उच्चार आणि गरिमामय सादरीकरणामुळे त्यांनी भारतीय वृत्तविश्वात वेगळे स्थान निर्माण केले.” त्या काळात न्यूज अँकरऐवजी ‘न्यूज रीडर’ ही संज्ञा प्रचलित होती. सरला माहेश्वरी आपल्या सादगी, संयम आणि आत्मविश्वासपूर्ण सादरीकरणासाठी विशेष ओळखल्या जात. त्यांच्या बातमी सादरीकरणाच्या शैलीमुळे प्रेक्षकांच्या मनात विश्वास आणि आपुलकी निर्माण झाली होती.

त्यांच्या निधनाबाबत कुटुंबीय आणि सोशल मीडियावरून मिळालेल्या माहितीनुसार, सकाळच्या फिरण्यासाठी बाहेर गेल्यानंतर परत येताना त्या पडल्या आणि त्यातच त्यांचा मृत्यू झाला. त्या दीर्घकाळापासून पार्किन्सन्स या आजाराने त्रस्त होत्या, अशी माहितीही समोर आली आहे. पार्किन्सन्स या आजारात मेंदूतील ‘सबस्टॅन्शिया नायग्रा’ या भागातील डोपामाइन तयार करणाऱ्या पेशी हळूहळू नष्ट होतात. त्यामुळे शरीरात कंप, स्नायूंमध्ये कडकपणा, चालण्यात मंदपणा आणि संतुलन बिघडण्याची शक्यता वाढते. अनेकदा बोलणे आणि लिहिण्यातही अडचणी निर्माण होतात. कुटुंबीयांच्या माहितीनुसार, फिरून घरी परतताना पडल्यामुळेच त्यांचे निधन झाले.

त्यांच्या निधनानंतर सहकाऱ्यांनीही भावना व्यक्त केल्या. एका माजी सहकाऱ्याने भावनिक पोस्ट करत लिहिले की, “माझ्या माजी सह-वृत्तनिवेदिका सरला माहेश्वरी यांच्या निधनाची बातमी अत्यंत वेदनादायक आहे. त्या अनुग्रह आणि शिष्टाचार यांचे प्रतीक होत्या. त्या केवळ चेहऱ्यानेच नव्हे, तर मनानेही अत्यंत सुंदर होत्या. भाषेवर त्यांचे विलक्षण प्रभुत्व होते आणि त्या ज्ञानाचा मोठा साठा होत्या.” त्यांच्या व्यक्तिमत्त्वाने आणि कामाच्या शैलीने अनेकांना प्रेरणा दिली होती.

कुटुंबीयांनी दिलेल्या माहितीनुसार सरला माहेश्वरी यांच्यावर आज 12 फेब्रुवारी रोजी सायंकाळी 4 वाजता दिल्लीतील निगम बोध घाट येथे अंत्यसंस्कार झाले. त्यांच्या जाण्याने भारतीय दूरदर्शन क्षेत्रातील एक प्रतिष्ठित आणि विश्वासार्ह आवाज कायमचा हरपला आहे.