एकरी 152 टन ऊस उत्पादन कसं घेतलं? शेतकऱ्यानं सांगितलं A टू Z टेक्निक

अतिशय कमी श्रम असणारं पीक म्हणून ऊस शेतीकडे पाहिले जाते. परंतु, ऊस हे आळशी नव्हे तर काटेकोर व्यवस्थापन करणाऱ्या शेतकऱ्यांचे पीक असल्याचं सांगलीतील शेतकऱ्यानं सिद्ध केलंय. श्रीकांत सुरेश गवळी यांनी एकरी 152 टन उच्चांकी ऊस उत्पादन घेतले आहे. गेल्या 8-10 वर्षांपासून जमिनीची तयारी केल्यानंतर एकरी 152 टनाचा उतारा काढणं शक्य झाल्याचं गवळी यांनी सांगितलं.

श्रीकांत सुरेश गवळी हे सांगलीच्या कडेगाव तालुक्यातील रामपूरचे सुशिक्षित शेतकरी आहेत. त्यांच्याकडे एकूण सात एकर शेती असून यापूर्वी ते भाजीपाला पिकवत होते. 2019 पासून आधुनिक तंत्रज्ञानाच्या वापरासह ते सात एकर उसाची शेती करत आहेत. ऊस पिकाबाबत स्वतःच्या अभ्यासासह त्यांनी गन्ना मास्टर या तंत्रज्ञानाचा वापर केला आहे. यामुळेच एकरी 152 टन विक्रमी ऊस उत्पादन घेणे शक्य झाले असल्याचे त्यांनी सांगितले.

ऊस पिकामध्ये सुधारित तंत्रज्ञान येईल तसे सरितील अंतर वाढत राहिले आहे. पारंपरिक पद्धतीमध्ये असणारे अडीच, साडेचार फूट अंतर वाढवत श्रीकांत यांनी तब्बल आठ फूट सरीतील अंतर ठेवले आहे. सरीतील अंतर वाढत जाईल तसे सरासरी उत्पादनात वाढ झाल्याचे श्रीकांत यांनी सांगितले.

एकरी 152 टन उच्चांकी उतारा घेतलेल्या शेताची गेल्या आठ वर्षांपासून काळजी घेत आहेत. मातीचा सेंद्रिय कर्भ वाढवण्यासाठी हरभरा पिकाचा बेवड ठेवला होता. तसेच शेतातील पाचट,पालापाचोळा न जाळता मातीमध्येच गाढून मातीतील जिवाणू जिवंत ठेवले आहेत.

श्रीकांत गवळी यांनी 152 उच्च उतारा मिळवलेल्या शेतामध्ये एकरी सहा ट्रॉली शेणखत वापरले. शेताची उभी-आडवी नांगरट करून 8 फूट अंतरावर सरी सोडली. गन्ना मास्टर तंत्रज्ञानाचे 86032 कोईमथूर बियाणे वापरून सव्वा फुटावर रोपांची लागवड केली. तज्ज्ञांच्या सल्ल्याने वेळच्यावेळी फवारण्या आणि विद्राव्य खते दिली.

ऊस लागवडीनंतर 39 व्या दिवशी जेठा काढला. 60 व्या दिवशी बैलांच्या सहाय्याने बाळभरणी केली. 90 व्या दिवशी पॉवर टेलरने हलकी भरणी दिली. 111 व्या दिवशी मोठी भरणी दिली. कुठल्याही प्रकारची चालढकल न करता श्रीकांत गवळी यांनी करेक्ट नियोजन केल्याने त्यांना जोमदार ऊस पिकवता आला. एका ऊसास 50-55 कांड्या तर चार-पाच इंच पेराजाडी वाढली.

एकरी 152 उतारा घेतलेल्या शेतात श्रीकांत गवळी यांनी एकही पाठपाणी दिले नाही हे विशेष आहे. संपूर्ण प्लॉट हा केवळ ठिबकच्या सहाय्याने वाढवला. यामुळे उसाला पाणी फार लागते हा गैरसमज ठरला आहे. 2019 मध्ये 125 टन, 2023 मध्ये 140 टन, तर 2024 मध्ये 152 टन असा उत्पन्नाचा आलेख चढता राहिला आहे.

श्रीकांत गवळी यांनी 152 उतारा घेण्यासाठी गन्ना मास्टर तंत्रज्ञानाचा वापर केला आहे. गन्ना मास्टर तंत्रज्ञान ही ऊस अभ्यासक आणि प्रयोगशील उत्पादकांनी एकत्र येऊन सुरू केलेले आधुनिक ऊस उत्पादनाचे तंत्र आहे. यामध्ये रासायनिक खते आणि पाण्याचा योग्य आणि आवश्यक वेळी वापर करत, ऊस उत्पादन वाढीवर भर दिला जातो.

युवा शेतकरी श्रीकांत गवळी यांना शेती कामामध्ये पत्नी, मुलगा आणि आई-वडिलांची मोठी साथ आहे. आधुनिक तंत्रज्ञानाने केलेल्या त्यांच्या शेतीस अनेक शेतकरी आवर्जून भेट देवून सल्ला घेतात. ऊस हे आळशी लोकांचे नव्हे तर करेक्ट व्यवस्थापन करणाऱ्या शेतकऱ्यांचे पीक असल्याचे श्रीकांत सांगतात. (प्रीती निकम, प्रतिनिधी)