कॉमेडी, इमोशन्स आणि भरपूर ड्रामा; रिलिजच्या 15 वर्षांनंतर सिनेमा OTT वर Hit, मिळाली 7.5 रेटिंग

प्रत्येकासोबत असं होतं की त्यांना कधीकधी आपल्यासोबत घडणाऱ्या आपल्या आजूबाजूच्या काही गोष्टी आवडत नाहीत. मग ते नावडती भाजी असो किंवा मनाविरुद्ध झालेलं लग्न. आपण त्या परिस्थितीपासून पळ काढण्याचा प्रयत्न करतो. पण काळानुसार आपल्याला समजतं की, ज्याला आपण बिनकामाचं किंवा नको असलेलं समजत होतो, तेच आपल्यासाठी सर्वात 'परफेक्ट' होतं. हीच मानवी स्वभाववैशिष्ट्ये आणि 90 च्या दशकातील नॉस्टॅल्जिया घेऊन आलेला एक सिनेमा सध्या पुन्हा एकदा चर्चेत आला आहे.

आपण बोलतोय 2015 मध्ये प्रदर्शित झालेल्या आणि सध्या नेटफ्लिक्सवर (Netflix) टॉप 10 मध्ये धुमाकूळ घालणाऱ्या 'दम लगाके हईशा' (Dum Laga Ke Haisha) या मास्टरपीसबद्दल. 11 वर्षांनंतरही हा सिनेमा नेटफ्लिक्सवर चौथ्या क्रमांकावर ट्रेंड करतोय, यावरूनच याची लोकप्रियता लक्षात येते.

आयुष्मान खुराना आणि भूमी पेडणेकर यांचा हा सिनेमा हरिद्वारच्या पार्श्वभूमीवर रंगला आहे. यात प्रेम (आयुष्मान) हा एक कमी शिकलेला मुलगा आहे, ज्याला आपल्या वडिलांच्या धाकामुळे मनाविरुद्ध लग्न करावं लागतं. त्याची पत्नी संध्या (भूमी पेडणेकर) ही सुशिक्षित आहे, पण ती 'प्लस साईज' (जास्त वजन असलेली) आहे. प्रेमला आपल्या पत्नीच्या जाडेपणाची लाज वाटते आणि तो तिला स्वीकारायला तयार नसतो.

संध्या ही एक स्वाभिमानी मुलगी आहे. ती स्वतःच्या सौंदर्याची तुलना वजनाशी करत नाही. जेव्हा प्रेम तिला सर्वांसमोर अपमानित करतो, तेव्हा दोघांमधील वाद विकोपाला जातो आणि गोष्ट थेट घटस्फोटापर्यंत पोहोचते. हा प्रवास जितका भावूक आहे, तितकाच तो मजेशीरही आहे. शरत कटारिया यांनी ज्या प्रकारे 90 च्या दशकातील वातावरण, ऑडिओ कॅसेट्सचं दुकान आणि मध्यमवर्गीय कुटुंबातील तणाव पडद्यावर मांडला आहे, तो पाहून कोणाचेही डोळे पाणावतील.

चित्रपटाचा खरा 'टर्निंग पॉईंट' येतो तो म्हणजे शहरात होणारी प्रसिद्ध 'दम लगाके हईशा' शर्यत. या शर्यतीत पतीला आपल्या पत्नीला पाठीवर उचलून धावायचं असतं. ही केवळ शारीरिक शर्यत नसते, तर ती एकमेकांवरील विश्वास आणि संवादाची कसोटी असते. प्रेम खरोखर संध्याला पाठीवर उचलून यशाची रेघ ओलांडतो का? हे पाहणं आजही तितकंच रोमांचक वाटतं.

ओटीटीवर पुन्हा का ट्रेंड होतोय हा सिनेमा?तर आयुष्मानचा निरागसपणा आणि भूमीचा खंबीरपणा आजही प्रेक्षकांना भुरळ घालतोय. आजच्या झगमगाटाच्या सिनेमांच्या काळात या सिनेमाची साधेपणा (Simplicity) लोकांना आपल्याशी जोडते. 7.5 रेटिंग असलेला हा सिनेमा पुन्हा स्ट्रीम झाल्यामुळे सोशल मीडियावर याचे डायलॉग्स आणि क्लिप्स पुन्हा व्हायरल होत आहेत.

थोडक्यात सांगायचे तर 'दम लगाके हईशा' हा केवळ एक रोमँटिक कॉमेडी सिनेमा नाही, तर तो स्वतःच्या कमतरता स्वीकारून दुसऱ्याच्या गुणांवर प्रेम करायला शिकवणारा एक आरसा आहे. जर तुम्ही या वीकेण्डला काहीतरी 'फील गुड' पाहण्याच्या शोधात असाल, तर ही फिल्म मस्ट वॉच आहे.