Jaran Marathi Movie Collection : 'जारण'चा नवा रेकॉर्ड, दुसऱ्या विकेंडला कोटींची कमाई, किती झालं कलेक्शन?

2025 वर्षात मराठी इंडस्ट्रीत दमदार सिनेमे रिलीज झाले आहेत. मे महिन्यात दोन सिनेमे रिलीज झाले. एक म्हणजे आता थांबायचं नाय आणि दुसरा म्हणजे गुलकंद. दोन्ही सिनेमांनी बॉक्स ऑफिसवर चांगली कमाई केली.

मागच्या आठवड्यात आणखी हॉरर मराठी सिनेमा प्रेक्षकांच्या भेटीला आला. ज्याने बॉक्स ऑफिसलाच जारण घातलं आहे. दमदार अभिनय, हृदयाचा भिडणारी कथा आणि उत्तम दिग्दर्शन यामुळे जारण या सिनेमानं बॉक्स ऑफिसवर तगडी कमाई केली आहे.

अवघ्या बारा दिवसात सिनेमाने उत्तम कमाई केली आहे. सिनेमाच्या बॉक्स ऑफिस कलेक्शनचा आकडा समोर आला आहे.

अभिनेत्री अनिता दाते आणि अमृता सुभाष यांचा तगडा अभिनय असलेल्या या हॉरर मराठी सिनेमानं प्रेक्षकांची मनं जिंकली आहेत. दोघींचा सशक्त अभिनयाने या कथेला भावनिक उंची मिळाली असून, त्यांचा अभिनय पाहून प्रेक्षक भारावून गेले आहेत.

अनेक दिवसांनी मराठीत काहीतरी नवा प्रयोग प्रेक्षकांना पाहायला मिळाला आणि प्रेक्षकांनी तो डोक्यावर घेतल्याचं पाहायला मिळतंय. सिनेमाचा वाढता प्रतिसाद पाहता थिएटर शो देखील वाढवण्यात आले आहेत.

जारण या सिनेमाने दुसऱ्या आठवड्याच्या विकेंडला 1.65 कोटींची कमाई केली आहे. सिनेमानं अवघ्या 12 दिवसात 3.5 कोटींचा गल्ला जमावला आहे.

चित्रपटाच्या यशाबद्दल दिग्दर्शक हृषिकेश गुप्ते म्हणाले, "जारण सारखा संवेदनशील विषय प्रेक्षकांसमोर सादर केला. ज्याला प्रेक्षकांनी भरभरून प्रतिसाद दिला याचा खूप आनंद होतो. इतक्या मोठ्या प्रमाणात प्रेक्षक, समीक्षक आणि इंडस्ट्रीतील दिग्गजांनी कथा आणि सादरीकरणाचं कौतुक केलं, हे एखाद्या दिग्दर्शकासाठी अत्यंत समाधानकारक आहे. प्रत्येक प्रतिक्रिया, प्रत्येक शाबासकी आम्हाला पुढच्या प्रवासासाठी प्रेरणा देते."

निर्माते अमोल भगत म्हणतात, "चित्रपटाला मिळणार प्रेक्षकांचा उत्तम प्रतिसाद पाहून मन भरून येते. थिएटर्समध्ये वाढणारे शो, बॉक्स ऑफिसवर वाढती आकडेवारी, आणि सोशल मीडियावरचा सकारात्मक प्रतिसाद हे सर्व पाहाता खरच खूप आनंद होतो. हे यश आमच्या संपूर्ण टीमच्या मेहनतीचे आहे."

सिनेमात अभिनेत्री अमृता सुभाष व अनिता दाते यांच्या प्रमुख भूमिका असून किशोर कदम, ज्योती माळशे, विक्रम गायकवाड, राजन भिसे, अवनी जोशी, सीमा देशमुख यांचाही दमदार अभिनय पाहायला मिळत आहे.