नाटकाच्या निमित्तानं भेट अन् 18 वर्षांचा सुखी संसार; नाशिकची अनिता दाते कशी झाली पुण्याची सून

'माझ्या नवऱ्याची बायको', 'नवा गडी नवं राज्य', 'इंद्रायणी' सारख्या सुपरहीट मालिका तसंच 'वाळवी', 'तुंबाड', 'जोगवा', 'जारण', 'मी वसंतराव' सारख्या दमदार सिनेमांमधून महाराष्ट्राच्या घराघरात पोहोचलेली अभिनेत्री म्हणजे अनिता दाते. अनिताने आपल्या कामातून प्रेक्षकांची मनं जिंकली. पण अनिताचं मन जिंकणारा अवलिया तुम्हाला माहितीये का? अनिता दातेचा 18 वर्षांचा सुखी संसार सुरू आहे. नाशिकची अनिता पुण्याची सून आहे. 

अनिताने चिन्मय केळकरबरोबर लग्न केलं. चिन्मय समुपदेशक, दिग्दर्शक आणि अभिनेता देखील आहे. दोघांची पहिली ओळख पुण्याच्या ललित कला केंद्रात झाली. दूरदर्शनला दिलेल्या मुलाखतीत बोलताना चिन्मयने दोघांची लव्ह स्टोरी सांगितली तो म्हणाला, "मी ललित केंद्रातून पास झाल्यानंतर ललित केंद्रात भेट व्हायची. ती तेव्हा तिथे होती. ती मला दिसली नाही."

"तिने 'मेड्स' नावाचं नाटक बसवलं होतं. ते तिने मला ऐकायला बोलावलं. नंतर मी पाहायला गेलो. तिचं दिग्दर्शन, लेखन, नाटक निवडण्यामागची भूमिका हे पाहून मी थक्क झालो. तेव्हा ती आतापेक्षा निम्मीही कॉन्फिडन्ट दिसायची नाही. ही बोलायला उत्सुक नाही असं वाटायचं. मी तिला थक्क होऊन सांगितलं की हे सगळं खूप भारी झालं."

"सिगरेट नावाचं मुंबईत नाटक केलं. तेव्हा रिहर्सल्सच्या वेळी मी तिच्या प्रेमात पडलो. तेव्हा ती बोलेल की नाही याची भीती होती, ती लगेच गळून पडली", असंही चिन्मय म्हणाला. 

चिन्मय विषयी बोलताना अनिता म्हणाली, "चिन्मय मला इतरांपेक्षा वेगळा वाटला. तो स्पष्ट बोलणारा मुलगा. हरहुन्नरी मुलगा ज्याला कदाचित वेगवेगळ्या गोष्टींची आवड आहे. त्याने खूप माणसं जोडली होती. त्याच्या प्रेमात पडणारी माणसं होती."

"तो कसाही वागला तरी त्यांना तो जवळचा वाटायचा. तो खूप वाचायचा, अनुभव गोळा करणारा मुलगा आहे. त्याने सांगितलं की तशीच्या तशी ती गोष्ट समोर उभी राहते. प्रत्येकाशी बोलताना त्याचा अप्रोच ग्रहण करणारा असायचा. तो सगळं वेचणारा होता त्यामुळे तो आपल्या आसपास असावा, जवळ असावा असं वाटलं. आणि आम्ही प्रेमात पडलो."

अनिता पुढे म्हणाली, "माझ्या घरी चिन्मय आवडला. मी निर्णय घेतला असेल तर त्यासोबत घरातील माणसं असतात. माझ्यामध्ये हा कॉन्फिडन्स होता की तुमच्यावर जबाबदारी नाही. माझ्या निर्णयाची जबाबदारी माझी. चिन्मय स्वतः भेटायला आला होता. त्यांना असं वाटलं की हा मुलगा योग्य आहे, विचारांनी स्वच्छ आहे. या क्षेत्रातील आहे त्यामुळे त्यांनी होकार दिला, त्यांना तो पसंत पडला."

चिन्मयने सांगितलं, "आम्ही सव्वा वर्ष कन्सिस्टन्सीने राहिलो. मी अत्यंत अवघड मुलगा आहे. तिने सांगितलेले गुण कधी अवघडही होतात. एक मुलगी सव्वा वर्ष आपल्याबरोबर आहे हेच मला वाटलं की हे आपल्याला पुरेसं आहे."