खेरवाडी, खेरनगर... अनुपम खेर यांनी सांगितला मुंबईतला पहिला पत्ता, म्हणाले 'जगातील कोणतीही ताकद मला...'

मुंबई: हिंदी सिनेसृष्टीतील दिग्गज अभिनेते अनुपम खेर यांना नुकताच '६० आणि ६१ वा महाराष्ट्र राज्य मराठी चित्रपट पुरस्कार' सोहळ्यात 'स्व. राज कपूर जीवन गौरव' पुरस्काराने सन्मानित करण्यात आलं.

मुख्यमंत्री देवेंद्र फडणवीस यांच्या हस्ते हा पुरस्कार स्वीकारताना अनुपम खेर खूप भावूक झाले. त्यांनी त्यांच्या सुरुवातीच्या दिवसांची एक आठवण सांगितली, जी ऐकून प्रत्येकाच्या डोळ्यात पाणी येईल.

अनुपम खेर म्हणाले, "मी ३ जून १९८१ रोजी मुंबईत आलो. नॅशनल स्कूल ऑफ ड्रामाचा मी गोल्ड मेडलिस्ट होतो. पण ज्या नोकरीच्या शोधात मी मुंबईत आलो होतो, तिथे नोकरी नव्हतीच. मला धोका मिळाला. माझ्या मित्राने मला १० दिवस त्याच्या घरी ठेवून घेतलं."

ते पुढे म्हणाले, "त्यावेळी मी एका चाळीत छोट्याशा खोलीत राहत होतो. आम्ही पाचजण त्या खोलीत राहत होतो. मला माझ्या चाळीचा पत्ताही नीट माहित नव्हता. मला अजिबात असं वाटत नव्हतं की माझं भविष्यात काही होईल. त्यावेळी टॅलेंटपेक्षा हेअरस्टाईलला जास्त महत्त्व होतं." त्यांच्या या बोलण्याने उपस्थितांना हसू आवरता आलं नाही.

त्यानंतर अनुपम खेर यांनी त्यांच्या मुंबईतील पहिल्या दिवसांची आठवण सांगितली. ते म्हणाले, "माझ्या घरमालकाच्या मुलाने मला घराचा पत्ता लिहून दिला. तो पत्ता वाचताच मी ठरवलं की जगातील कोणतीही ताकद मला यशस्वी होण्यापासून अडवू शकत नाही. माझा मुंबईतील पहिला पत्ता होता, अनुपम खेर, 2/15, खेरवाडी, खेरनगर, खेर रोड, बांद्रा इस्ट! तेव्हा मला हे नाव ऐकून खूप आनंद झाला."

यावेळी त्यांनी मुंबई शहरावर आपलं प्रेम व्यक्त केलं. "४० वर्षे कशी निघून गेली, कळलंच नाही. पण माझं या शहरावर असलेलं प्रेम आणि सन्मान आजही तसाच आहे. मुंबई शहर खूप मोठ्या मनाचं आहे. इथे जो कोणी येतो, त्याला एक संधी नक्कीच मिळते."

अनुपम खेर यांनी सांगितलं की, आज मी ७० वर्षांचा आहे, पण मी माझ्या आयुष्याच्या प्रवासात अजून मध्यंतरापर्यंतही पोहोचलो नाहीये. त्यांच्या या सकारात्मक भूमिकेने सर्वांनाच प्रेरणा दिली आहे. त्यांच्या या भावना आणि आठवणी ऐकून अनेक कलाकारांनाही त्यांच्या सुरुवातीच्या दिवसांची आठवण झाली असेल.