सूरजच्या खांद्यावर बंदूक ठेवून चालवणारे गेले कुठे? लग्नाला न आलेल्यांबद्दल थेटच बोलली जान्हवी किल्लेकर

बिग बॉस मराठी 5 चा विजेचा सूरज चव्हाणचं डिसेंबर 2025 मध्ये लग्न झालं. सूरजने त्याच्या मामाची मुलगी संजनाशी लग्न केलं. सूरजच्या लग्नाची खूप चर्चा झाली. पण सूरजच्या लग्नात बिग बॉसची खूप कमी मंडळी दिसली. ज्यामुळे एकूणच चर्चा सुरू झाल्या.

सूरजच्या लग्नात करवली म्हणून मिरवणारी जान्हवी किल्लेकरनं त्याच्या लग्नाला न आलेल्यांवर चांगलीच तोफ डागाळली आहे. सूरजच्या खांद्यावर बंदूक ठेवून चालवणारे आता कुठे गेले असा थेट प्रश्न तिनं केला आहे.

नवशक्तिला दिलेल्या मुलाखतीत बोलताना जान्हवी किल्लेकर म्हणाली, "सूरज चव्हाण अमेरिकेत नव्हता राहत की बाबा फ्लाइट बुक करायची, सात समुंदर पार करून तुम्हाला यायचं होतं. जेजुरी होतं लग्न. तो साखरपुड्याला मोबाईल घेऊन बसला होता."

"जान्हवी बघ ना याचा फोन आलाय पण मला इथे आवाज येत नाहीये. कदाचित ते फोन करत होते की आम्हाला जमणार नाहीये असं सांगण्यासाठी पण त्यांचा काही कॉन्टॅक्ट येत नव्हतं. पण तो विचारत होता हा येईल.. मी त्याला सांगत होते हो येणार आहेत, झालंय माझं बोलणं, असा दिलासा मी त्याला देत होते. पण कोणीच आलं नाही."

"मला फार वाईट वाटलं. मी नेहमी स्पष्ट बोलते तसं आज मी स्पष्ट बोलणार आहे. जे लोक बिग बॉस मराठीमध्ये असताना म्हणत होते की आम्ही सूरजचं पालकत्व घेतो, माझा मुलगा आहे त्याचं पुढचं सगळं आम्ही करू, आम्ही सगळं बघू. त्या व्यक्तीने त्याला लग्नात आशीर्वाद द्यायला तरी यावं."

जान्हवी पुढे म्हणाली, "आम्ही बिग बॉसमध्ये त्याचे दुश्मन होतो मग आम्ही परवडलो. त्याची फिल्म रिलीज झाली होती. निक्कीने स्वत: दोन थिएटर बुक केले होते, मी एक दोन थिएटर बुक केलेले."

"मग हे पालकत्व स्वीकारणे किंवा सूरजच्या खांद्यावर बंदूक ठेवून चालवणारी माणसं गेली कुठे? म्हणजे हे किती फेक आहे. ही किती फेक माणसं आहेत. मग आम्ही स्पष्ट बोलून जगासमोर व्हिलन ठरलो हे चाललं यार आम्ही चांगले तरी आहोत. आमची दुश्मनी तेवढ्यापुरती होती. बाहेर आल्यानंतर काहीच नाही", असंही जान्हवी म्हणाली.